Astanada feldsher Uldana Myrzýannyń qazasyna qatysty sot protsesi jalǵasyp jatyr. Búgin jaryssóz aldynda sot protseske qatysýshylardyń ótinishterin qarady, dep habarlaidy ult.kz.
Sýdia Merýert Abaeva marqumnyń kúieýi Ádilet Zeineldiń buǵan deiin ózin jábirlenýshi mártebesinen alyp tastaý týraly ótinish bergenin eske saldy.
— Osy qylmystyq is boiynsha jábirlenýshi mártebesinde qalasyz ba, burynǵy ótinishińizden bas tartasyz ba? — dep surady sýdia.
Zeinel burynǵy ótinishinen bas tartatynyn jáne sotta jábirlenýshi mártebesinde qalatynyn rastady.
Buǵan deiin onyń advokaty Murat Máýmetov Zeineldiń Uldananyń anasynyń paidasyna jábirlenýshi mártebesinen bas tartýǵa nietti ekenin aitqan edi.
Uldana Myrzýannyń qazasyna qatysty sot 18 tamyzda bastalǵan. Is boiynsha aiyptalýshy — qaiǵyly oqiǵa bolǵan úidiń MIB tóraǵasy Sáýle Jubaniiazova. Ol ózin kináli dep sanamaitynyn málimdedi.
2025 jylǵy 8 qarashada Astanadaǵy Táýelsizdik dańǵyly, 24 B mekenjaiyndaǵy toǵyz qabatty úidiń qasbetinen kirpish qaptama qulap, bes adam zardap shekken. Olardyń arasynda zardap shekkenderge kómek kórsetýge kelgen 23 jastaǵy feldsher Uldana Myrzýan da boldy. Ol aýyr jaraqat alyp, 18 qarashada aýrýhanada kóz jumdy.
Sot barysynda kýágerler, úi turǵyndary men qurylys salasynyń mamandary jaýap berdi. Saraptamada qasbette aqaý belgileri qaptama qulaǵanǵa deiin paida bolǵany aityldy.
Is Qylmystyq kodekstiń 254-baby («Mindetterine adal qaramaý») boiynsha qaralyp jatyr.
