Biylǵy toǵyz aida elordada 320-dan astam áiel zorlyq-zombylyqtan qorǵaý tobynyń inspektorlaryna kómekke júgingen. Bul týraly Áielderdi zorlyq-zombylyqtan qorǵaý tobynyń aǵa inspektory Gúlmira Shyrahmetova búgin baspasóz konferentsiiada aitty, dep habarlaidy QazAqparat.
«2020 jyldyń toǵyz aiynda 320-dan astam áiel bizdiń kómegimizge júgindi. 160-qa jýyq áiel Áielderdi zorlyq-zombylyqtan qorǵaý tobynyń jeke qabyldaýynda boldy. Bala-shaǵaly 39 áiel Daǵdarys ortalyǵyna ornalastyryldy. Olardyń ótinishteri boiynsha 93 quqyq buzýshy ákimshilik jaýapkershilikke tartylyp, 127 qorǵaý nusqamasy shyǵaryldy. 47 áielge azamattyq-quqyqtyq qatynastarda kómek kórsetilip, 89 adam májbúrlep emdeý mekemelerine ornalastyryldy. Olardyń keibireýi balalarymen birge Daǵdarys ortalyqtaryna ornalastyryldy. Al keibireýine úkimettik emes uiymdardyń ókilderimen birge kómek kórsetildi», - deidi Gúlmira Shyrahmetova.
Inspektorlar turmystyq zorlyq-zombylyq qurbany bolǵan áielderge máselelerin sheshýge, jumys tabýǵa, keide qujattaryn qalpyna keltirýge kómektesedi.
«Adam quqyǵy jáne zańdylyqty saqtaý jónindegi Qazaqstandyq biýro Ýkrainadan Keńes Odaǵy kezeńinde kelgen áieldiń qujattaryn qalpyna keltirdi. Buǵan deiin onyń eshbir qujaty bolmaǵan. Tiisinshe, áieldiń balalarynda da eshbir qujat bolmaǵan. Qujattardy qalpyna keltirgennen keiin ol balalaryna áleýmettik tólemder ala bastady jáne jumysqa ornalasyp, baspanaly boldy. Mundai mysaldardy kóptep keltirýge bolady», - deidi aǵa inspektor.
Onyń aitýynsha, áielder inspektorlarǵa ártúrli máselemen júginedi.
«Biz úilestirýshi organ retinde úkimettik emes uiymdarǵa habarlasyp, olarǵa kómektesemiz. Kóptegen áiel kúieýlerimen de jumys jasaǵanymyzdy qalaidy. Azamattyq bastamalardy qoldaý ortalyǵy bar. Olar qazir 12 otbasymen jumys isteýde. Bul otbasylarǵa qiyndyqtardy jeńýge jáne otbasydaǵy qarym-qatynasty retteýge kómektesedi», - deidi Gúlmira Shyrahmetova.
Inspektordyń sózinshe, otbasylyq daý-damaida erli-zaiyptynyń bireýi ǵana kináli bolýy múmkin emes.
«Biz otbasyny barynsha saqtap qalýǵa tyrysamyz. Al otbasyn saqtap qalý múmkin emes jaǵdai bolsa – onda áńgime basqasha, árine. Turmystyq zorlyq-zombylyq kóp jaǵdaida ishimdik ishken kúide bolady jáne qol kóterýge de kóp jaǵdaida qyzǵanysh sebep bolady», - deidi ol.
Eske salaiyq, elimizde turmystyq zorlyq-zombylyq qurbany bolǵan áielder úshin 1409, al jynystyq zorlyq-zombylyq qurbandary úshin +7081060810 jáne 150 nómiri boiynsha bailanys ortalyqtary jumys isteidi. Bul senim telefondary arqyly quqyqtyq jáne psihologiialyq keńes alýǵa bolady.
