QR Premer-Ministriniń orynbasary Eraly Toǵjanov QR Aqparat jáne qoǵamdyq damý ministrligine birqatar mindetterdi júktedi, dep habarlaidy QazAqpartat.
«Otbasylyq-genderlik saiasatty jetildirý boiynsha jańa qadamdardy ázirleý kerek. Qazirgi kezde tiisti zań jobasy qajetti talqylaýdan ótip jatqanyn bilemiz. Birinshi kezekte ol otbasylyq-turmystyq zorlyq-zombylyqqa qatysty bolyp tur. Jańa depýtattyq top quryldy. Keshe ǵana Parlamentte depýtattarmen birge osy taqyrypty talqyladyq. Bul másele qoǵamdy alańdatyp otyrǵanyn bilesizder. Sondyqtan sizdermen birlese osy baǵytta jumys isteitin qadamdar bar», - dedi E. Toǵjanov atalǵan ministrliktiń keńeitilgen alqa májilisinde.
Ol atalǵan zań jobasy tiisti rezonans týdyrǵanyn atap ótti.
«Bul óz kezeginde zańdy qubylys. Osy oraida biz atalǵan reaktsiiaǵa, syn-qaterge nazar aýdarýymyz kerek. Sondyqtan qoǵam kóterip otyrǵan máseleler mindetti túrde eskeriledi», - dedi Úkimet basshysynyń orynbasary.
