Ákimdikte baspana kezeginde turǵandardyń bazasy Otbasy bankine beriledi. Bul jaiynda QR Premer-Ministri Asqar Maminniń Májilis depýtattarynyń saýalyna bergen jaýabynda aitylǵan, dep habarlaidy "Ult aqparat".
«Turǵyn úi saiasatyn reformalaý máseleleri jónindegi Qazaqstan Respýblikasynyń zań jobasynyń tujyrymdamasy aiasynda ákimdikterdiń turǵyn úidi esepke alý jáne bólý jónindegi fýnktsiialaryn jańadan qurylǵan Otbasy bankine berýdi kózdeitin jańa turǵyn úi reformasynyń quraldaryn engizý jónindegi tásilder maquldandy. Ákimdikterde kezekte turǵandardyń aǵymdaǵy bazasy (shamamen 556 myń adam) Otbasy bankine beriledi. Otbasy banki bazasynda «Turǵyn úimen qamtamasyz etý ortalyǵy» qurylady. Ol kezekte turǵandardyń biryńǵai respýblikalyq elektrondyq bazasyn júrgizýdi, monitoringteýdi, ózektendirýdi, turǵyn úige muqtajdardy esepke qoiýdy jáne esepke alýdy, sondai-aq turǵyn úidiń qoljetimdilik satysyna sáikes qoiý kúni boiynsha azamattarǵa turǵyn úidi bólý ortalyqtandyryp júzege asyratyn bolady», - dedi Asqar Mamin.
Úkimet basshysynyń atap ótýinshe, zań jobasy Zań jobalaý qyzmeti máseleleri jónindegi vedomstvoaralyq komissiianyń otyrysynda qaraldy jáne maquldandy.
Ázirlengen zań jobasy jariia talqylaý úshin ashyq normativtik quqyqtyq aktilerdiń internet-portalyna ornalastyryldy jáne osy jylǵy 22 aqpanda saraptamalar alýǵa (ǵylymi-quqyqtyq, ekonomikalyq, sybailas jemqorlyqqa qarsy, lingvistikalyq), sondai-aq jumys tobynyń múshelerine qaraý jáne aldyn ala kelisý úshin jiberildi.
«Odan ári jumys Qazaqstan Respýblikasynyń ýákiletti organdarynda zań jobalaý jumysyn uiymdastyrý qaǵidalaryna sáikes belgilengen tártippen júzege asyrylady. Osyǵan bailanysty turǵyn úige ashyq elektrondyq kezekti iske asyrý qurylatyn Turǵyn úimen qamtamasyz etý jónindegi ortalyqty eskere otyryp, Otbasy banki bazasynda júrgiziledi. Sonymen qatar, ákimdikter kezekte turǵandar boiynsha túgendeýdi aiaqtaǵannan keiin osy jyldyń ekinshi toqsanynda Otbasy banki bazasynda turǵyn úilerdi bólý fýnktsionalyn avtomattandyrý kózdeledi», - dedi Premer-Ministr.
