Aqparat jáne qoǵamdyq damý ministri Dáýren Abaev sapaly ónim shyǵarý úshin otandyq serial óndirýshilermen qandai jumystar júrgizilip jatqanyn aityp berdi, dep habarlaidy QazAqparat.
«Otandyq serial óndirý, túsirý salasyna qarap otyrsaq, biz shynynda da, kúrdeli jolmen júrýdi bastap ketippiz. Otandyq prodiýsserlik kompaniialar sapaly serial túsire bastaýy úshin barynsha qoldaý bildirdik. Saiyp kelgende, eń ońai jol – daiyn ónimdi satyp alyp, transliatsiialaý. Al sonshalyqty úlken sanalmaityn 18 million adamy bar memlekette bul baǵyttaǵy naryqty damytý – ózin-ózin aqtai bermeitin ónim. Al bizdiń jaǵdaida memleket otandyq óndirýshilerdi qoldaýdy sheshti. Biz shynynda da, barlyq jaǵdaidy jasap berdik. Ekinshi jaǵynan, bul mehanizm jumys istei bastaǵanda qandai máselelerdi sheshý kerektigi de aiqyndala bastady. Máselen, qazir bizge qymbat serialdardy túsirý qiynǵa túsip tur. Sebebi, biz tariftik kestege qaraimyz. Al bizge negizinen smetalyq sipatqa mańyz bergen abzal», - dedi Dáýren Abaev elordada ótip jatqan Astana Media Week sharasynda.
Ministrdiń aitýynsha, belgili bir prodiýsserge aqshany bere salyp, tarihi serial túsir deý asa oń jambasqa kele bermeitin ádis.
«Biz serial túsirilimine qajetti somaǵa qaraýymyz kerek. Bul baǵytta úlken jumys júrgizemiz degen oidamyz.
Media salasyndaǵy azamattar muny jaqsy biledi. Sonda da aityp óteiin, teleserialdar biýdjet esebinen qarjylandyrylady. Jalpy, 2016 jyly memlekettik tapsyryspen 16 serial túsirildi. Osy jyly bul kórsetkish aitarlyqtai artty. Mysaly, biyl 43 telehikaia efirge shyǵady dep josparlanyp otyr. Úsh ese ósken. Alaida biz memlekettik telearnalarǵa ǵana emes, jekemenshik arnalarǵa da kóp kóńil bólemiz», - dedi ol.
Máselen, ministrdiń dereginshe, kommertsiialyq telearnalar 2017 jyldan bastap qazirgi ýaqytqa deiin memlekettik aqparattyq tapsyrys aiasynda 47 serial túsirgen.
«Alaida, biz serialdardyń sanyna ǵana emes sapasyna da mán beremiz. San artqan jerde shyǵarmashylyq básekege de jol ashylady. Ony bilesizder. Osylaisha, serialdar indýstriiasyn qalyptastyrýdaǵy múmkindik paida bolady. Buryn biz otandyq serialdardy az dedik. Endi túsirilgen serialdardy syrtqa satýdy bastadyq. Mysaly kórshiles memleketterge, 15 otandyq serialǵa 9 elge litsenziialyq quqyqtar berildi. Bul jumysty odan ary jalǵastyramyz», - dedi Dáýren Abaev.
Onyń atap ótýinshe, Aqparat jáne qoǵamdyq damý ministrligi kommertsiialyq telearnalarmen jumys isteý tetikterin jetildirýdi qolǵa almaq. Smetalyq-jobalyq formaty qarastyrylyp jatyr. Halyqaralyq tájiribe de nazarǵa alynatyn bolady.
«Munyń barlyǵyn media naryqpen aqyldasa otyryp sheshetin bolamyz. Qoryta aitqanda, otandyq serial naryǵy damyp jatyr. Shyǵarmashylyq toptar qalyptasty. Sheberlikteri shyńdalyp keledi. Túbinde bul qalai desek te bizdiń aqparattyq qaýipsizdigimizge oń áserin tigizetindigi anyq», - dedi ministr.
Sonymen birge, Dáýren Abaev shara barysynda «Otandyq serial óndirýshilerge salyq jaǵynan jeńildik berile me?» degen suraqqa jaýap berdi.
«Salyq boiynsha barlyq suraqtardy qazirdiń ózinde taldap jatyrmyz. Meniń oiymsha, jyldyń sońyna deiin bul baǵyttaǵy jaǵymdy jańalyqtar bolady. Tájiribe kórsetip otyrǵandai, eger osy ispen ainalyspaǵanda, qosarlana júretin máselelerin de bilmes edik. Jumys júrgize bastaǵanda qandai másele baryn uǵyp, olardy sheshe bastadyq», - dedi Dáýren Abaev.
Eske sala ketsek, elordadaǵy «Qazmedia» ortalyǵynda úsh kúnge sozylatyn Ortalyq Aziiadaǵy eń iri media-oqiǵa — Astana Media Week ótip jatyr. Astana Media Week-tiń birinshi kúni serialdyq ónimderdi ázirleý jáne shyǵarý taqyrybymen jáne salyq preferentsiialary, kino prokatynyń sharttary, mazmuny, film óniminiń shyǵarmashylyq deńgeii jáne onyń demeýshiler úshin tartymdylyǵy taqyrybymen erekshelenedi.
