«Nur Otan» partiiasy fraktsiiasynyń músheleri Káribai Musyrman men Darhan Myńbai otandyq mýltfilmderdiń sapasyzdyǵyn synǵa alyp, QR Premer-Ministriniń orynbasary Eraly Toǵjanovqa depýtattyq saýal joldady, dep habarlaidy "Ult aqparat".
«El bolam deseń, besigińdi túze!» degen eken Muhtar Áýezov. Búginde sondai besiktiń biri, iaǵni tanym men tárbie qainary – mýltfilmder ekendigi daýsyz. Keshegi balalar orystyń «Qap, bálem, tura turyn» qyzyqtaǵan bolsa, búgingi balalar – «Masha men aiýdy» kórip máz. Olarmen otandyq animatorlarymyzdyń qai týyndysy básekelese alady? Rasynda da, teledidar men internette kórsetilip júrgen otandyq mýltfilmderdiń kórkemdik deńgeii kóńil kónshitpeidi. «Aldarkóse», «Ertóstik» siiaqty mýltfilmderde halqymyzdyń aýyz ádebietindegi súiikti keiipkerleriniń obrazdary burmalanyp, ulttyq qundylyqtarymyz aiaqqa basylǵan bolyp shyqty. Birer mysal: «Aldarkóse» mýltfilminde bir kempir úiine kóńildesin kirgizip alyp, shalyn uryp-soǵyp qýyp jiberedi. Bul oidan shyǵarylǵan, ultymyzdyń dástúrine jat qylyq emes pe? Ony kórgen bala qandai tálim alady? Al «Ertóstik» mýltfilminde qazaq kisi etin jeitin kannibal retinde sipattalǵandyǵy jaǵańdy ustatarlyq jaǵdai emes pe? Uly oishyl, aqyn Abai týraly orys tilindegi 9 seriialy mýltfilmniń ataýy «Jaýynger joly» eken. Sol ataýyna sáikes Abai babamyz kóshede ketip bara jatqan jalǵyz qyzǵa jabylǵan buzaqylarmen tóbelesedi. Tipti aiýmen de alysyp, jeńip shyǵady. Bul mýltfilmniń ideialyq-kórkemdik deńgeii, mine, osyndai», - dedi Májilis depýtaty.
Onyń atap ótýinshe, elimizdiń telearnalarynan kórsetiletin, basqa tilderden qazaq tiline aýdarylǵan kóptegen mýltfilmniń sapasy da syn kótermeidi. Olardyń aýdarmalary men dybystalýy bala sanasy men talǵamyna sai kele bermeidi.
«Sannan sapa týyndaityny belgili. Bizde shyǵarylatyn mýltfilmder sany da mardymsyz. Mádeniet jáne sport ministrliginiń bergen málimetine súiensek, animatsiialyq filmderdiń negizgi óndirýshisi Sháken Aimanov atyndaǵy «Qazaqfilm» aktsionerlik qoǵamy bazasynda qurylǵan «Animatsiialyq kino» shyǵarmashylyq-óndiristik birlestigi keiingi 3 jyl ishinde jalpy somasy 610 million teńgeni quraǵan memlekettik tapsyrys boiynsha nebári 6 mýltfilm shyǵarǵan. Bul rette kórshiles Resei Federatsiiasynda jyl saiyn 100 shaqty mýltfilm memlekettik tapsyrys arqyly shyǵarylatyndyǵyn aitqan jón», - deidi Káribai Musyrman.
Májilis depýtatynyń aitýynsha, Mádeniet jáne sport ministrligine aldaǵy jyly ulttyq filmder shyǵarý úshin respýblikalyq biýdjetten 1 milliard 159 million tenge bólinip otyr. Osy qarjynyń eleýli bóligin animatsiialyq filmderdi shyǵarýǵa jumsaǵan jón bolar edi.
Osyǵan orai ol Úkimet basshysy orynbasarynyń qaraýyna birneshe usynys jasady.
«Birinshiden, Mádeniet jáne sport ministrligi Qazaqstan animatorlar odaǵymen birlesip, animatsiialyq filmderde ulttyq qundylyqtardy nasihattaý jáne olardy burmalaýdyń aldyn alý máselesin qaraǵany jón. Ekinshiden, otandyq animatsiialyq filmder sanyn kóbeitý maqsatynda olardy shyǵarýǵa arnalǵan memlekettik tapsyrys kólemin arttyrý máselesin qaraý qajet. Úshinshiden, Aqparat jáne qoǵamdyq damý ministrligi animatsiialyq filmder shyǵaratyn jáne olardy kórsetetin telearnalarda shyǵarylǵan jáne basqa tilderden qazaq tiline aýdarylǵan animatsiialyq filmderdiń kórkemdik deńgeiin jáne bala tárbiesine áserin anyqtaityn kórkemdik keńester qurý jáne olardyń quramynda sarapshylar retinde tájiribeli pedagog, psiholog, qazaq tili mamandary mindetti túrde bolýy máselesin qarasyn. Tórtinshiden, otandyq animatsiia mamandarynyń biliktiligin jetildirý úshin olardy shetelderdegi jetekshi animatsiialyq stýdiialarda taǵylymdamadan ótkizý qajet. Besinshiden, Sháken Aimanov atyndaǵy «Qazaqfilm» aktsionerlik qoǵamyn animatsiialyq filmder óndirisine qajetti osy zamanǵy tehnikalyq jabdyqtarmen jabdyqtaý máselesin qaraý kerek», - deidi Káribai Musyrman.
