Qazaqstanda qurastyrylǵan jeńil kólik baǵasynyń qymbattaýyna shetelden keletin qosalqy bólshekter sebep bolyp otyr. Bul týraly QR Indýstriia jáne infraqurylymdyq damý ministri Qaiyrbek Óskenbaev aitty, dep habarlaidy QazAqparat.
Búgin Úkimet otyrysynan shyqqan ministrge BAQ ókilderi otandyq kólik baǵasynyń sharyqtap ketkenin alǵa tartyp, onyń sebebin suraǵan bolatyn.
Ministrdiń sózine qaraǵanda, elimizde qurastyrylatyn kólik baǵasynyń kóterilýine shetelden keletin bólshekterdiń qymbat bolýy áser etip otyr.
«Biyldan bastap ár kólik shyǵaryp jatqan zaýytqa óz baǵdarlamasyn bekittik. Qai jyly jáne qandai ónimder (kóliktiń qosalqy bólshekteri) óz ishimizde shyǵarylýy kerektigin anyqtadyq. Ókinishke qarai ony tez arada almastyrý múmkin emes. Ár shyǵaratyn qosalqy bólshekke sheteldik zaýyttan sertifikat alýymyz kerek. Mysaly, Hiýndai kóligi bolsa, onyń ishine salynatyn zatty shyǵaratyn bolsaq, onda «sizderdiń kólikterińizge óz bólshekterimizdi salýǵa bola ma» dep ruqsat alýymyz kerek. Al oǵan uzaq ýaqyt ótedi. Iaǵni, másele qolymyzdan kelmegennen emes, tirkeý rásimderi óte uzaqqa sozylyp jatqandyǵynda», - dep túsindirdi Qaiyrbek Óskenbaev.
Sonymen qatar ol quny 10 mln teńgege deiingi otandyq kólikterdi satyp alýǵa 4 paiyzdyq jeńildikpen nesie beriletindigin atap ótti.
Osy oraida tilshiler reseilikterdiń qazaqstandyq kólikterdi jappai satyp alyp jatqanyn alǵa tartyp, olarǵa da nesie jeńildikpen berilýi múmkin be ekendigin surady.
«Eń aldymen biz tek qazaqstandyqtarǵa ǵana kredit beremiz. Sheteldikterge kredit bereiik dep otyrǵanymyz joq», - dep jaýap berdi ministr.
