Qazaqstanda jaryq kórip jatqan kitaptardyń 50 paiyzdan astamy balalar men jasóspirimderge arnalǵan. Bul týraly QR Mádeniet jáne sport ministri Aqtoty Raiymqulova málim etti, dep habarlaidy QazAqparat.
«Búginde balalar men jasóspirimderdiń kitap oqýǵa degen qyzyǵýshylyǵyn arttyrý baǵytynda birqatar sharalar júrip jatyr. Sonymen qatar oqý, jazýǵa yntaly jas talanttardy da qoldaýǵa asa mán berilýde. Búginde elimizde shyǵatyn kitaptardyń 50 paiyzdan astamy balalar men jasóspirimderge arnalǵan. Jáne sońǵy shyǵyp jatqan kitaptarda arnaiy QR kod bar, ol balalarǵa oqýǵa yńǵailylyq úshin jasalyp otyr. Iaǵni qajet jaǵdaida kitapty elektrondy formatta da oqi alady. Bul baǵyttaǵy jumystar jalǵasyn tabady», - dedi Aqtoty Raiymqulova elordada ótip jatqan ulttyq mektep sport ligasy barysynda.
Sondai-aq, ministr balalar shyǵarmashylyǵyn damytýǵa arnalǵan sharalarǵa toqtalyp ótti.
«Búgin elordada «Jas qalamger» balalar men jasóspirimderge shyǵarmashylyq baiqaý qorytyndylandy. Elimizge tanymal aqyn, jazýshylar balalarǵa dáris oqyp, ádebiet salasyna jol ashyp berdi. Odan bólek, jýyrda ǵana «Er tóstik» ádebi festivali de óz máresine jetti. Oǵan ár óńirden daryndy balalar qatysyp, baq synady. Ol jerde balalar men jasóspirimderdiń úzdik degen avtorlyq shyǵarmalary aiqyndaldy. Elimizde shyǵarmashyl talanttar jetkilikti jáne biz olardy qoldaýǵa ázirmiz», - deidi ol.
