.jpg)
Foto: Niyet_derss paraqshasynan
Qazirgi kezde jastar ulttyq kiimdi kúndelikti kiiýi úshin sán áleminde qandai kiim úlgisi trendte, soǵan sáikestendirip, jastar qyzyǵatyndai, kiiýge yńǵaily, minimalizm úlgisinde tigý qajet dep esepteidi Ult.kz tilshisi suhbattasqan dizainer Gúljan Nietqabyl.
Gúljan Nietqabyl – T.Júrgenov atyndaǵy Óner akademiiasyn kiim dizainy mamandyǵy boiynsha bitirgen. Sodan beri kiim dizainy aiasynda jumys istep kele jatyr. 2004-2010 jyldar aralyǵynda ulttyq kiim tigetin «Erke–Nur» sán úiinde dizainer bolyp jumys istegen. 2011 jyldan bastap jeke kiim tsehyn ashyp, sodan beri ulttyq kiimdi damytýǵa úles qosyp keledi. Osy jyldan bastap sahnada júrgen kóptegen ártisterdiń, mádeniet úileri men teatrlarǵa sahnalyq kiimder de tigip júr.
Foto: Niyet_derss paraqshasynan
Al 2016 jyldan bastap qarapaiym halyqtyń kúndelikti kietin minimalizm stilinde kiim úlgilerin qoljetimdi baǵada jasaýǵa tyrysyp kele jatyr. Ol qazaqtyń ulttyq kiimderin shetelde de kórsetip júr. Norvegiia, Grýziia, Dýbai men Ázerbaijanda ulttyq kiimderdiń sán aptalyqtarynda jumystaryn kórsetken.
Foto: Niyet_derss paraqshasynan
«Jastardy qyzyqtyrý úshin olardyń elikteitin ánshileri, kóz aldynda júrgen blogerler arqyly trendke engizý kerek»
Ol jýyrda Á.Qasteev atyndaǵy óner mýzeiinde qazaqtyń ulttyq kiimin halyqqa dáriptep, kúndelikti kiiýge bolatynyn kórsetip, tanytý maqsatynda óziniń jeke kórsetilimin ótkizgen.
Fotolar: Niyet_derss paraqshasynan
«Meniń oiymsha, jastarǵa kúndelikti ulttyq kiimdi kigizý úshin qazirgi ýaqytta sán áleminde qandai kiim úlgisi trendte, soǵan sáikestendirip, keltirip, jastar qyzyǵatyndai, kiiýge yńǵaily, minimalizm úlgisinde jasasa kiedi dep oilaimyn. Sebebi, men ózim sol baǵytta jumys isteimin. Minimalizm stilinde, kúndelikti kiiýge arnalǵan kiimder. Men 2011 jyldan beri osy baǵytta jumys istep kele jatyrmyn. Salystyrsa, jastar arasynda osyndai kiim úlgileri kóp suranysqa ie. Qazir uialmai kiedi. Buryn tańǵalatyn. "Kúnde kiiýge bola ma, Naýryzda kimei me, sahnada kimei me?" degen siiaqty bolatyn. Al qazirgi kezde, 2016 jyldan beri etno stil trendke qatty kirgennen beri jastardyń suranysy artty. Sol sebepti, jastardy qyzyqtyrý úshin olardyń elikteitin ánshileri, kóz aldynda júrgen blogerler arqyly trendke engizý kerek. Sol kezde olar únemi kiip júredi dep oilaimyn», – deidi dizainer Gúljan Nietqabyl.
Fotolar: Niyet_derss paraqshasynan
«Tipti, bizde jip te shyqpaidy»
Jalpy qoǵamda kópshilik "ulttyq naqyshtaǵy kiimderdiń baǵasy nege qymbat?" degen suraqty jii qoiady. Suhbattasymyz dizainer Gúljan Nietqabyldyń bul suraqqa jaýaby daiyn eken.
«Ózim osy tsehty ashqaly kóptegen adamdar ulttyq naqyshta kiim alǵysy keletinin kórdim. Biraq keibir adamdardyń jaǵdaiy, qaltasy kótere almai jatady. Sebebi, ainalyp kelgende, onyń túbi – bizdiń memleketimizde shikizat joq. Shikizatty shetelden ákelemiz. Tipti, bizde jip te shyqpaidy. Negizgi matasyn qoiǵanda, jip pen túime siiaqty usaq-túiektiń ózin shetelden alamyz. Sonyń bárin shetelden ákelgennen keiin, árine matanyń baǵasy qymbatqa shyǵady. Sonymen qatar, bizde tigetin tiginshi, qiiatyn qiiýshy siiaqty masterlerdiń ózi joqtyń qasy. Kez kelgen tigin tsehynyń problemasy sapaly kiim tigetin jumysshy tabý. Onyń da baǵany qymbatqa satýǵa áser etedi. Óitkeni, jumysshy az bolǵandyqtan, bar jumysshy qymbat suraidy. Sonyń barlyǵyn eseptegende, bizdiń tigip jatqan kiimimizdiń qunyna áser etedi», – dep otyr dizainer Gúljan Nietqabyl.
Foto: Niyet_derss paraqshasynan
Aita keteiik, elimizde 18-shi naýryz «Ulttyq kiim kiiý kúni» dep bekitilgen. Alaida sońǵy jyldary ulttyq naqyshtaǵy kóilek, shapan, kájekei men kamzoldy, sondai-aq áshekei buiymdardy merekede ǵana emes, kúndelikti turmysta jappai kiiý sánge ainaldy.
Aqbota Musabekqyzy
