Sýret: 365info.kz
Ǵylym jáne joǵary bilim ministri Saiasat Nurbek úkimet otyrysynyń qorytyndysy boiynsha ótken brifingte Qazaqstanda ázirlengen onkologiiany emdeýge arnalǵan preparattyń adamdarǵa júrgizilgen klinikalyq synaqtarynyń birinshi kezeńinen sátti ótkenin habarlady. Endi otandyq qaterli isikke qarsy dáriniń klinikalyq synaqtarynyń ekinshi kezeńi bastaldy, dep habarlaidy "Ult aqparat".
Zertteýge onkologiiamen aýyratyn 15 naýqas qatysty. Ministrdiń aitýynsha, preparat birinshi synaqtan joǵary tiimdilik kórsetip, sátti ótti. Saiasat Nurbek keler jyly dárini tirkeýge shyǵarýdy josparlap otyrǵanyn jetkizdi.
"1 shildeden bastap testileýdiń ekinshi kezeńi bastaldy. Klinikalyq synaqqa shamamen 3 myń adam qatysady. Barlyǵy 5 myńnan astam onkologiialyq naýqas synaqqa qatysýǵa niet bildirip, tirkeldi. Joǵary ǵylymi-tehnikalyq komissiianyń sheshimimen zertteý tobyna ekinshi kezeńdi júrgizýge shamamen 2 mlrd teńge tamyz aiynda aýdarylady. Jyl sońyna deiin biz barlyq derekti óńdeimiz", – dedi ministr.
Ekinshi kezeń ártúrli qaterli isik túrleri bar adamdarǵa dárini tekserýdi qamtidy. Synaqtar Astana, Almaty jáne Pavlodar qalalarynda ótkiziledi.
Birinshi kezeńniń nátijesinde preparat onkologiianyń eń agressivti túrleriniń biri — toq ishek qaterli isiginiń IV satysyndaǵy naýqastar arasynda tiimdiligin kórsetti. Isiktiń kólemi orta eseppen 30% azaidy.
