Otandyq biotehnolog, ǵalym Dos Sarbasov onkologiia salasynda mańyzy zor ǵylymi jańalyq ashty. Bul týraly Ǵylym jáne joǵary bilim ministri Saiasat Nurbek áleýmettik jelidegi paraqshasynda málimdedi, dep habarlaidy "Ult aqparat".
"Jahandyq onkologtar munyń sebebimen kúresip, oǵan qarsy turarlyq barlyq sharalardy ǵylymi turǵydan izdený ústinde. Dei turǵanmen, munyń tóte joly ońailyqpen tabyla salmasy anyq. Izdengen jeter muratqa demekshi, osyndai salmaqty, álem jurtshylyǵyn oilantqan máseleniń jaýabyn otandyq biotehnolog, ǵalym Dos Sarbasovtyń tapqany shyn máninde úlken ǵylymi jańalyq boldy. Dos Jarmuhanbetuly Amerikanyń Tehas ýniversitetindegi Anderson onkologiialyq ortalyǵynda uzaq jyldar boiy jumys istegen. Qazirgi tańda elimizdegi ulttyq zerthananyń jetekshisi. Búginde biotehnolog bolǵanyna qaramastan, onkologiia salasynda belsendi jumys istep keledi. Meditsina mamandarynyń aitýynsha, onkologiialyq aýrýlardyń metabolizmi joǵary bolyp keledi. Iaǵni jasýshasy tez tarap, lezde kóbeiedi. Osynyń aldyn alý úshin Dos Jarmuhanbetuly DVC preparatyn shyǵaryp, onkologiialyq aýrýlardyń taralý jasýshasyn toqtatýǵa yqpal etýdiń jolyn oilap tapty", - dep jazdy ministr.
DVC-di shyǵarýdyń alǵashqy mehanizmi 2015 jyly bastalǵan. Ǵalymnyń ǵylymi jańalyǵynyń negizinde ashyǵý men sodan týatyn emdik effekt – aýtofagiiany rak jasýshalaryn joiýǵa qoldaný tásili jatyr.
"Aýtofagiia qubylysyn túsingennen keiin aldymyzǵa "rak kletkalaryn joiý úshin adam qansha ýaqyt ashyǵýy tiis?" - degen saýal qoidyq. Zertteý barysynda aǵzaǵa gliýkoza jetispegen kezde, jasýsha aýtofagiia qubylysyn iske qosatynyn anyqtadyq. Al 48 saǵat boiy ashyqqan adamnyń aǵzasyndaǵy qaterli isik jazýshalary joiylatyny belgili boldy", - dep atap ótti biotehnolog ǵalym.
