Otandyq balyq jəne balyq ónimderi naryǵy qazirgi 66 myńnan 120 myń tonnaǵa deiin eki ese artýy múmkin. Bul týraly Ekologiia, geologiia jəne tabiǵi resýrstar ministri Maǵzum Myrzaǵaliev aitty, dep habarlaidy "Ult aqparat" vedomstvonyń Telegram-yna silteme jasap.
«Otandyq balyq jəne balyq ónimderi naryǵy kólemin 66 myń tonnadan 120 myń tonnaǵa; balyq aýlaýdy 45 myń tonnadan 60 myń tonnaǵa deiin Kaspii teńizi resýrstaryn igerý esebinen; balyq ósirýdi 7-den 60 myń tonnaǵa deiin arttyrýǵa bolady», - dedi Maǵzum Myrzaǵaliev Atyraý qalasynda ótip jatqan Qazaqstannyń balyq sharýashylyǵyn damytý jónindegi keńeste.
Onyń atap ótýinshe, bul Qytai men Resei syndy əlemdik naryqtaǵy eksport kólemin kóbeitýge múmkindik beredi. Osy maqsatqa qol jetkizý úshin salada birqatar sharalar iske asyrylady. Atap aitqanda, balyq aýlaý kezeńin uzartý josparlanýda.
«Bizdiń balyqshylar Kaspii teńizinde reseilik əriptesterine qaraǵanda kəsipshilikti 11 kúnge kem atqaratyndyqtan aýlaý merzimi ulǵaitylady. Budan basqa, Jaiyq ózenindegi balyq aýlaý merzimi 15 mamyrǵa deiin uzartylady. Tiisti buiryq jaqyn arada qabyldanady», - dedi Ekologiia ministri .
M.Myrzaǵalievtiń aitýynsha, bul sharalar balyq aýlaý kólemin kóktemde 7 myń tonnadan 10 myń tonnaǵa deiin arttyrýǵa múmkindik beredi.
Sondai-aq, aýmaqtyq inspektsiialarǵa balyq aýlaý merzimin aýa raiyna bailanysty aýystyrý týraly jedel sheshim qabyldaý quqyǵyn berý oilastyrylýda. Bul norma Parlament Məjilisiniń qaraýyndaǵy «Týristik qyzmet týraly» zań jobasyna engizilgen. Balyq resýrstaryn paidalaný aqysyn qaita qaraý məselesi de qosymsha zerdeleýdi talap etedi.
«Məselen, kókserkeniń bir kelisi úshin bizde biznes 35 teńge, al Resei 6 teńge tóleidi. Bul problemalardy ońtaily sheshý bizneske zor kómek bolar edi», - dedi M. Myrzaǵaliev.
Ekologiia ministrligi basshysy sonymen qatar, RF sekildi túngi ýaqytta balyq aýlaýǵa ruqsat berý, sondai-aq balyqshylar «Aqjaiyq» tabiǵi rezervatynan ótý kezinde tóleitin aqyny alyp tastaý múmkindigin qarastyrýdy usyndy. Qazirgi ýaqytta tərtip boiynsha bir adamǵa ótý aqysy bir kúnge 265 teńgeni quraidy.
Ministr balyq ósirý salasynda ósý qarqyny baiqalatyndyǵyn aitty. Məselen, sońǵy 7 jylda ósirilgen balyq kólemi 9 ese, 800 tonnadan 7 myń tonnaǵa deiin artqan.
«Balyq ósirýge qyzyǵýshylyqty arttyrý úshin birqatar sharalar kózdelýde. Balyq aýlaý sharýashylyǵyn ózenderdegi sý qorǵaý aimaǵyna ornalastyrýǵa ruqsat berý kerek. Mundai təjiribe kórshiles Ózbekstan men Qyrǵyzstan elderinde bar. Odan soń, balyq ósirýde sý resýrstaryn paidalaný aqysyn esepteý mehanizmin ózgertý qajet. Sebebi, sýlandyrýǵa qaraǵanda, barlyq derlik sý qaita qaitarylady ǵoi. Sondyqtan býlaný jəne súzilý boiynsha ǵana aqy tólenýi tiis», - dedi ministr.
