Búgin Almatyda Quran kitabynyń orys tiline aýdarylǵan nusqasynyń tusaýkeseri ótti, dep habarlaidy Baq.kz agenttigi.
Aýdarmanyń avtory Serik Rysjanov Islam dinin 1998 jyldan beri zerttep kele jatqandyǵyn jáne Qurannyń buǵan deiin orys tiline aýdarylǵan nusqalarynyń barlyǵymen tanysqandyǵyn jetkizdi.
«Buǵan deiingi orys tilindegi aýdarmalary meni qanaǵattandyrmady, olar ár kezeńde, ózge ortada aýdarylǵan. 2008 jyly gazette jumys istep júrgende Qurandy aýdarýdy qolǵa alyp, osy taqyrypta birneshe maqala jazdym. Bizge Qurannyń aýdarmalary ózge elderden keledi, tipten Reseiden kelgenniń ózinde ondaǵy orta bizden alshaq. Al bizdiń elde munymen eshkim ainalyspady, sondyqtan men ony bizdiń halyqqa túsinikti etip aýdarýǵa tyrystym», -deidi avtor.
«Avtor bul aýdarmany jasaǵan kezde Qurannyń túpnusqa mátinine súiengen. Bul Qurandy oqý arqyly kóp nársege basqasha kózqaraspen qarai bastadym. Munyń sebebi aýdarý tásilinde dep oilaimyn. Avtor Qurandaǵy mátinderdi aýdarǵanda basqasha túsinýge jol bermegen. Iaǵni ekstremistik, radikaldyq, kemsitýshilik máselesinde óte muqiiat bolǵan», -deidi "NAROK" Qorynyń múshesi Ál-Farabi Bolatjan.
Aýdarmanyń avtory Qurandy tek arab tilinde oqý kerek nemese dini ilimi bar ǵulamalardyń túsindirýimen meńgerý kerek degen túsinik bar ekenin aita kele, ony qarapaiym halyqqa túsinikti etip jetkizýge tyrysqanyn aitty.
«Eger ony tek arabsha oqý kerek dep qaraityn bolsaq, Quran tek arabtarǵa nemese onyń mazmunyn túsindiretin ǵulamalarǵa qajetti, jabyq kitap siiaqty bolyp qalady. Men qarapaiym halyqtyń eshkimniń túsindirýinsiz oqyp, tanityndai etip jasaýǵa tyrystym», -deidi Serik Rysjanov.
