Foto: skrinshot
Qazaqstan Respýblikasynyń Qorǵanys ministrligi azamattar men ásker arasyndaǵy ózara is-qimyldy jeńildetýge arnalǵan jańa MyArmy.kz internet-portalyn qoldanysqa engizdi, dep habarlaidy Ult.kz.
Buǵan deiin tek jergilikti áskeri basqarý organdaryna baryp qana alýǵa bolatyn qyzmetter endi onlain rejimde qoljetimdi.
Azamattar merzimdi nemese kelisimsharttyq qyzmetke ótinim bere alady, ózekti jańalyqtarmen jáne jii qoiylatyn suraqtarmen tanysa alady, sondai-aq keri bailanys nysandaryn paidalana alady.
Ótinimder úsh kezeńnen ótedi: jasalǵan – óńdelýde – qabyldandy/qabyldanbady. Bul júie komissiia jumysynyń ashyqtyǵyn arttyryp, úmitkerlerdiń protsesti qadaǵalaýyna múmkindik beredi.
MyArmy.kz SARBAZ+ pilottyq jobasy aiasynda iske qosyldy. Joba Almaty oblysyndaǵy 78460 áskeri bóliminde synalýda. Sátti júzege asqan soń, tájiribe elimizdiń basqa áskeri bólimderine engiziledi.
Portaldyń engizilýi:
-
áskeri qyzmetke shaqyrý rásimderin jeńildetedi;
-
biýrokratiia men adami faktordy azaitady;
-
meditsinalyq komissiiadan ótý protsesin jedeldetedi;
-
áskerge shaqyrylýshylarǵa óz mamandyǵyna sáikes áskeri bólimdi tańdaýǵa múmkindik beredi.
Qorǵanys ministrliginiń málimetinshe, jańa tsifrlyq qural áskerge shaqyrylýshylarǵa áleýmettik jáne bilim berý múmkindikterin keńeitedi ári Qarýly kúshterdi jańǵyrtýǵa yqpal etedi.
