Áleýmettik jelide otbasynyń jaǵdaiyn aityp, elden kómek suraǵan 9 jasar Myrzan Orazymbetke Shymkentten úlken úi syiǵa tartyldy, dep habarlaidy QazAqparat.
«Meniń bir ǵana armanym bar. Bir baspana bolsa da jetedi. Ósken kezde qaitaryp beremin. Shyn aitamyn» degen áleýmettik jelide taraǵan 9 jasar balanyń videosy kópshiliktiń júregin eljiretken bolatyn. Januianyń jaǵdaiyn jelide akter Madiiar Serikpaev kórsetken edi.
Bala ájesimen, kóz janarynan aiyrylǵan anasymen jáne bala kezinen múgedek eki aǵasymen turady.
«Haraket» qairymdylyq qory elden qarjy jinap, Orazymbettiń otbasyna úi alyp berdi. Úidiń sertifikaty «Habar» telearnasyndaǵy «Túngi habar» baǵdarlamasynyń tikelei efirinde tabystaldy.
Qýanyshtan jylap jibergen jetkinshek kópshilikke alǵysyn aityp, rizashylyǵyn bildirdi.
Sondai-aq qordyń atynan Orazymbetke kompiýter berildi. Al anasynyń kózin emdetý úshin tegin sertifikat tabystady. Odan bólek, jetkinshektiń esep-shotyna 5 mln teńge aýdarylatyn boldy.
«Jan jomart jandarǵa rahmet aitamyz. Meiirimdilik azaiyp bara jatqan zamanda, ótip bara jatqan adamnan kemshilik izdeitin zamanda, bir-birimizdi jaqsy kórip, bir-birimizge qamqor bolyp, meiirimdilikpen qaraǵan kezde ǵana jan-jaǵymyz jainai túspek» - degen Sáken Maiǵaziev igi iske uiytqy bolǵan barsha azamattarǵa alǵysyn aitty.
