Óskemendegi Úlbi metallýrgiialyq zaýyty men D.Serikbaev atyndaǵy ShQMTÝ-dyń birlesken jobasyna japoniialyq kompaniia qyzyǵýshylyq tanytyp otyr, dep habarlaidy QazAqparat tilshisi.
Shyǵys Qazaqstan memlekettik tehnikalyq ýniversitetiniń ǵalymdary ÚMZ mamandarymen birge titan jáne niobiden kompiýterlik tomografiiaǵa qajet joǵary ótkizgish symdar jasaýdy qolǵa alǵan bolatyn. Eki jyl boiy joba teoriialyq turǵydan pysyqtalyp, ótken jyldyń ortasynda alǵashqy úlgisi alynǵan. Onyń sapasyn tekserý úshin Japoniiaǵa jiberipti. Furukawa Electric Co., Ltd kompaniiasynyń mamandary alǵashqy úlginiń sátti shyqqanyn kórip, jobamen jan-jaqty tanysý úshin Óskemenge keldi. Japoniialyq delegatsiiany oblys ákimi Danial Ahmetov ózi qabyldap, meimandarmen jobanyń bolashaǵy týraly pikir almasty. Japoniialyq kompaniianyń saýda jónindegi bas direktory Hirokazý Tsýboýchi óskemendik jobanyń alǵashqy ónimi sapaly bolyp shyqqanyn atap ótti.
«Jalpy, ónimniń sapasy oidaǵydai. Biz jasaǵan synaqtardyń bárinen sátti ótti. Óz tarapymyzdan óndiris protsesin ońtailandyrý boiynsha naqty usynysymyz bar. Bul turǵyda sizderge tehnologiialyq qoldaý kórsetýge daiynbyz» - dedi Japoniia ókili.
Al Danial Ahmetov jyldyń ekinshi jartysynda Óskemenniń titany men niobii daiyn ónim retinde saýdaǵa shyǵýy múmkin ekenin aitty.
«Bes milliard teńgeden astam qarjyǵa birneshe tehnologiialyq joba bastaǵan bolatynbyz. Sonyń biri - ÚMZ men ShQMTÝ birlesip iske asyryp jatqan joǵary ótkizgish sym óndirisi. Alǵashqy úlgini japoniialyq mamandar joǵary baǵalap otyr. Olar aitqan kishigirim eskertpelerdi engizip, ónimdi barlyq talapqa sai etetin bolamyz. Jyldyń ekinshi jartysynda jobanyń kommertsiialyq kezeńine kóshýimiz múmkin. Bul ónimniń qandai tehnikalyq bazada óndirilip jatqanyn japoniialyq áriptesterimiz osy issapar barysynda kóretin bolady» - dedi Danial Ahmetov.
Kezdesýden keiin jýrnalisterdiń suraǵyna jaýap bergen Hirokazý Tsýboýchi jobanyń bolashaǵy zor ekenin atady. Alaida, kompiýterlik tomografiiaǵa aýadai qajet dep sanalatyn atalmysh symdardy qansha kólemde satyp alýǵa nietti ekenderin ashyp aitpady.
«Ázirge áriptestik qatynas keńes berý deńgeiinde ǵana tur. Sondyqtan qandai da bir sandy aitý qiyn. Bárin ýaqyt kórsetedi» - dedi ol.
Usynylyp otyrǵan symdar «NT-47» markaly balqymadan jasalady. Aldaǵy eki kún boiy japoniialyq delegatsiia atalmysh balqymany alý joldarymen tanysady dep kútilýde.
