Óskemen qalasynyń turǵyny qarajatyn zańsyz qolma-qol aqshaǵa ainaldyrǵany úshin sottaldy, dep habarlaidy "Ult aqparat".
Qarjy monitoringi komitetiniń Shyǵys Qazaqstan oblysy boiynsha ekonomikalyq tergeý departamenti is júzinde jumys oryndamai, qyzmet kórsetpei, taýardy tiep-jóneltpei shot-faktýra jazý faktisiniń jolyn kesti.
Jedel izdestirý sharalarynyń barysynda kúdiktiniń ekinshi deńgeili bankte aqsha qarajatyn júieli túrde qolma-qolǵa ainaldyryp otyrǵany anyqtaldy
Óskemen qalasyndaǵy bir bankte 14,9 million teńge kólemindegi aqsha qarajatyn qolma-qolǵa ainaldyrý barysynda jalǵan kásiporyn basshysy ustaldy.
Óskemen turǵyny 2015-2019 jyldar aralyǵynda jalǵan 4 kásiporyndy týystary men tanystaryna tirkei otyryp, jalǵan býhgalterlik qujattardy jazyp berýmen ainalysqan. Bul kásiporyndarda kásipkerlik qyzmetti júzege asyrý úshin avtokólik, úi-jai, óndiristik tehnikalyq baza jáne qyzmetkerler shtaty bolmaǵan.
Jalǵan firma basshylarynyń qarjy sharýashylyq máselesimen ainalyspaǵany, býhgalterlik esep júrgizbegeni jáne salyq esebin tapsyrmaǵany anyqtaldy.
Is júzinde firmalar qylmystyq is-áreketti júzege asyrý úshin, kontragentterge salyqtan jaltarý úshin jalǵan esepshot jazyp berýmen ainalysqan.
Nátijesinde memleketke tólenbegen salyq túrinde 852,5 mln teńge kóleminde shyǵyn kelgeni anyqtaldy.
Óskemen qalasy №2 sotynyń úkimimen aiyptalýshy QR QK 28 jáne 216 baptarynyń 3-bólimi boiynsha kináli dep tanylyp, shartty túrde 3 jylǵa bas bostandyǵynan aiyryldy.
