Óskemende 15 jastaǵy qyz Almatyǵa qashyp ketken, dep habarlaidy QazAqparat.
Qalalyq Politsiia basqarmasy baspasóz qyzmetiniń málimetinshe, politsiiaǵa júgingen áiel adam kámeletke tolmaǵan qyzyn taýyp berýdi suraǵan. Onyń aitýynsha, 15 jastaǵy Oksana 27 maýsymda saǵat 07.00-de úiden shyǵyp, joǵalyp ketken.
«Anasy qyzynyń áleýmettik jeli arqyly bir jigitpen tanysyp, Almaty qalasyna qashyp ketkenine senimdi bolǵan. Telefonyna qońyraý shalǵanynda ol úige qaitýǵa úzildi-kesildi bas tartqan. Politsiia qyzmetkerleri kámeletke tolmaǵan qyzdy tabý úshin izdestirý sharalaryn qolǵa aldy», - dedi basqarma bastyǵy Andrei Mýla.
Tártip saqshylary 8-synyp oqýshysynyń shamamen ornalasqan jerin anyqtaǵannan keiin Almaty qalasyna jolǵa shyqty. Izdeýge kámeletke tolmaǵandar isi jónindegi ýchaskelik inspektor Qairat Ótepbaev pen kriminaldyq politsiia bóliminiń jedel ýákili Nurtas Bolatov attanǵan.
«Anyqtalǵan mekenjaiǵa kelgende Oksana joq bolyp shyqty. Olar bul úidi jalǵa alǵan eken. Qandai da bir aqparat alý úshin sol mańdaǵy barlyq adamdardan joǵalǵan qyz týraly surap shyqtyq. Kórshilerdiń aitýynsha, jasóspirim qyz Túrksib aýdanyna ketken», - dedi Qairat Ótepbaev.
Onyń aitýynsha, basty mindet – kámeletke tolmaǵan balany tez taýyp, anasyna qaitarý boldy. Sol úshin politseiler bar kúsh-jigerin jumsaǵan. Óitkeni qyz úiinen tym alysta beitanys adamdarmen júrgen.
«Áiteýir, Oksanany aialdamalardyń birinen taptyq. Qyz áleýmettik jelidegi jigit týraly eshteńe aitpady. Jai ǵana Almatyda ómir súrgisi kelgendigin alǵa tartty. Alaida anasy qarsy bolǵandyqtan qashyp ketýge májbúr bolǵanyn jetkizdi», - dedi tártip saqshysy.
Politsiia qyzmetkerleri osy oqiǵaǵa orai tekserý jumystaryn jalǵastyrmaq.
