Óskemende áieldi órtten qutqaryp qalǵan jigitter marapattalady. Bul týraly Shyǵys Qazaqstan oblysynyń TJD málimdedi - dep habarlaidy Tengrinews.kz.
12 naýryzda Protozanov kóshesinde ornalasqan úidiń toǵyzynshy qabatyndaǵy páterden órt shyqqan. ShQO TJD órt sóndirý bóliminiń qyzmetkerleri kelgenge deiin úsh jigit oqiǵa ornyna jaqyn mańda bolyp, páterden shyǵyp jatqan tútindi baiqaǵan. Keiin balkon karnizinde ázer turǵan áieldi kórgen.
"Berik Saǵymbaev, Daryn Jánibekov, Bektemir Álibekov oilanbastan kómekke keldi. Kireberiske júgirip kelip, órt shyqqan páterdiń tómenindegi kórshi páterge kóterilgen. Keiin balkonǵa shyǵyp, Berik Saǵymbaev áieldi shyǵaryp alǵan. Oǵan dostary Daryn jáne Bektemir kómektesken. Meditsinalyq kolledjde oqyp júrgen Daryn qoryqqan áielge alǵashqy kómek kórsetken. Sodan keiin olar páterlerdi aralap, turǵyndarǵa órt týraly habarlaǵan. Barlyǵy qaýipti nysannan tez arada shyǵyp úlgergen", - dedi vedomstvonyń baspasóz qyzmeti ókili.
