Foto: Polisia.kz
Óskemende tártip saqshylary jyldam ári úilesimdi áreketiniń arqasynda ana men balanyń ómirin saqtap qaldy. Bul týraly Ult.kz habarlady.
Oqiǵa 17 shilde kúni saǵat 14:20 shamasynda bolǵan. "102" jedel arnasyna qala turǵyny Úlbi ózeninde tanysynyń qyzy men birge sýǵa túsip, qatty aǵysqa ilesip ketkeni týraly habar bergen. Dabyl túsken sátte kezekshi kómekshisi Oljas Orazov jedel áreketke kóship, jaqyn mańdaǵy patrýldik politsiia ekipajyna naqty koordinattar boiynsha baǵyt berdi.
Oqiǵa ornyna patrýldik politsiia batalony rotasynyń komandiri Madiiar Muhamedjanov basqaratyn №9 ekipaj dereý jetken. Sol sátte Úlbi politsiia bóliminiń kriminaldyq politsiia bastyǵynyń orynbasary Suńǵat Seiiljanov ta jaqyn mańda bolyp, derbes túrde ózenge jetip, birden sýǵa sekirip, anasy men balany qutqarýǵa umtyldy.
Sýdyń qatty aǵysyna qaramastan, Seiiljanov ana men balany sý betinde ustap tura aldy. Artynsha Muhamedjanov ta kómekke kelip jetti. Alaida aǵys kúshti bolǵandyqtan, óz kúshterimen jaǵaǵa shyǵý múmkin bolmady. Politseiler qutqarýshylardyń qaiyqpen kelýin kútip, sol sátte de adamdardyń qaýipsizdigin qamtamasyz etti.
Úilesimdi qimyl men jedel sheshimniń arqasynda qaiǵyly jaǵdaidyń aldyn alý múmkin boldy. Qazirgi ýaqytta anasy men qyzynyń ómirine eshqandai qaýip joq. Oqiǵanyń mán-jaiy anyqtalyp jatyr.
