Óskemen qalasyndaǵy Baýyrjan Momyshuly kóshesinde ornalasqan kópqabatty turǵyn úidiń syrtqy qaptamasy buzylyp, túsip jatyr. Narazylyq bildirgen turǵyndar quzyrly organdarǵa aryzdanýda. Al shahar ákimdiginiń málimetinshe, bul úi memlekettik biýdjet qarajaty esebinen salynbaǵan.
21 sáýir kúni Baýyrjan Momyshuly kóshesindegi 9 qabatty turǵyn úidiń qabyrǵasyna qaptalǵan material buzylyp, túsip jatqandyǵy týraly video áleýmettik jelilerde qyzý talqylandy, dep jazady QazAqparat.
«Baspanaly boldyq» dep bórkimizdi aspanǵa atyp júrsek, qýanyshymyz uzaqqa sozylmady. Úidiń sapasy syn kótermeidi. Syrtyn qaptaǵan material keshe tústen keiin buzyldy. Bul degen sumdyq qoi! 2019 jyly paidalanýǵa berilgen úi 2 jylǵa jetpei osyndai bolyp jatsa, aldaǵy ýaqytta ne kútýge bolady?! Sondyqtan úidi salǵan kompaniiany jazaǵa tartý kerek!» - dedi qala turǵyny Baqytbek Ámirenov.
Jurttyń kóbisi baspanany ipotekalyq baǵdarlama arqyly alǵan eken. Narazylyǵyn bildirgen olar quzyrly organdarǵa baryp shaǵymdanýda.
«Kópqabatty turǵyn úi memlekettik biýdjet qarajaty esebinen salynbaǵan. Qurylys jumystaryna jergilikti atqarýshy organdardyń qatysy bolǵan joq. Qarjy «Qazaqstan turǵyn úi kompaniiasy» AQ tarapynan bólingen. Qurylys jumystary aiaqtalǵannan keiin atalǵan kompaniia Otbasy bankimen kelisim jasasty», - dep habarlady shahar ákimdigi.
Qazirgi ýaqytta ákimdik atalǵan máselege orai arnaiy komissiia qurdy. Úige zertteý júrgizilip, kemshilikter túgel anyqtalmaq.
