Óskemende sintetikalyq esirtkini qalanyń túkpir-túkpirine jasyryp ketip júrgen 11 adam ustaldy, dep habarlaidy QazAqparat.
Óskemende esirtki qylmysyna qarsy is-qimyl sharalary kúsheitildi.
Bul úshin Shyǵys Qazaqstan oblysynyń politseileri oblys prokýratýrasymen ózara is-qimylda jáne QR IIM arnaiy bólimsheleriniń qatysýymen qolda bar barlyq quraldar men arnaiy múmkindikterdi paidalana otyryp, esirtki zattarynyń zańsyz ainalymynyń jolyn kesýge baǵyttalǵan arnaiy is-sharalar keshenin ótkizdi.
Áleýmettik jeliler men internetke júrgizilgen monitoring nátijesinde sintetikalyq zattardyń taralýyna qatysy bar saittar anyqtaldy.
Óskemen qalasynda qalyptasqan jaǵdaidy taldaý jáne qadaǵalaý arqyly quqyq qorǵaý organdary sintetikalyq esirtki salatyn 10-nan astam adamnan turatyn topty anyqtady.
ShQO PD bastyǵynyń orynbasary politsiia polkovnigi Talǵat Shaiahmetov atap ótkendei, qajetti dálelder bazasyn jinaýǵa jáne kúdiktilerdi ustaýǵa birneshe apta qajet bolǵan.
Osy ýaqyt ishinde jedel ýákilder táýlik boiy demalyssyz jumys istedi.
Olar qylmystyq áreketi baiqalmai qalady dep senip, qastandyq sharalaryn muqiiat oryndady, ol úshin kiimderin únemi aýystyryp otyrdy jáne kei jaǵdailarda jasandy shash (parik) qoldandy.
Ustalǵandar týraly aqparat qylmystyq tizbektiń basqa qatysýshylaryna jetpeýi úshin kúdiktilerdiń árqaisysy bólek ustaldy.
Olardan sintetikalyq esirtkiniń 220-dan astam bir rettik dozasy jáne «ekstazi» dep atalatyn 80 tabletka tárkilendi.
Búginde atalǵan adamdardyń bári derlik sottyń sanktsiiasymen qamaýǵa alyndy.
Olardyń áreketi QR QK 297-babynyń 3-bóligi boiynsha saralanady.
Osy baptyń sanktsiiasynda 10 jyldan 15 jylǵa deiingi merzimge bas bostandyǵynan aiyrý jazasy kózdelgen.
