Foto: yk-news.kz, Elena Bredihina
Oqiǵa qaladaǵy ortalyq kóshelerdiń birinde boldy. Turǵyndar sózinshe, zardap shekken adam kir jaiyp turǵanda balkon tesilip qulap ketken, - dep habarlaidy Massaget.kz portaly yk-news.kz saityna silteme jasap.
Kýágerler jaraqat alǵan áieldiń joly boldy desti. Sebebi ol kóp keńse ornalasqan ǵimarattyń mańyna qulady. Al ol jerde meditsinalyq bilimge ie birneshe adam bar. Aq halattylar kelgenge deiin qoldan kelgen kómekterin aiamaǵan.
"Páterinde tamaq istep júrip balkonǵa shyqqan siiaqty. Múmkin, kir jaiý kerek boldy ma eken? Biz júgirip jetkende "úide balam qaldy" dep birneshe ret aitty. Áiteýir kórshileriniń birinen "bolgarka" tabylyp, esiktiń temirin kesip jiberdi. Úige kirgende ishin tolyqtai tútin basyp ketipti. Al ústeldiń astynda bala aiqailap jylap otyr. Syrt kózge alty ailyq sábi siiaqty kórindi. Jamylǵyǵa orap alyp shyǵyp, áieldiń týysqandary kelgenshe keńsede qaldyrdyq", – deidi Raýshan Smailova.
Bolǵan jaittyń taǵy bir kýágeri jaraqattanǵan áieldiń kórshisi, ári osy kópqabatty úidiń jetekshisi bolyp júrgen Liýbovia Zinoveva.
"Bul úide kóbi páter jaldap turady. Olar osy ýaqytqa deiin balkon qaýip tóndirip turǵanyn, beton bólikteri jii qulaitynyn aityp júrdi. Biraq eshkim buǵan mán bermedi. Sońy nemen aiaqtalǵanyn ózderińiz de kórdińizder. Qaita slesar mamandar bar eken: esiktiń temirin kesip, balany qutqaryp qaldy. Negizinde, esikti ashýdyń ózi kóp ýaqytty aldy", – dedi ol.
Nátijesinde zardap shekken áieldi jedel járdem kóligi alyp ketti, al bala áieldiń týysqandarymen qaldy. Oblystyq Densaýlyq saqtaý basqarmasy ókilderiniń aqparatyna súiensek, balkonnan qulaǵan turǵynnyń ómirine eshqandai qaýip tónip turǵan joq.
