Shyǵys Qazaqstan oblysynyń ákimi Danial Ahmetov Óskemen qalasynda úi kezeginde turǵan jetim jáne ata-ana qamqorlyǵynsyz qalǵan 20 balaǵa páter kiltterin tabys etti, – dep habarlaidy oblystyq ákimdiktiń baspasóz qyzmeti.
Aita ketý kerek, jastarǵa baspana oblys ortalyǵyndaǵy jańa 19-yqsham aýdanynda boi kótergen bes qabatty turǵyn úiden berildi. Tuńǵysh Prezident kúni qarsańynda qonys toiyn toilaǵan qala turǵyndarynyń qýanyshyna ortaqtastan aimaq basshysy ár shańyraqqa yrys pen yntymaq, molshylyq pen bereke tiledi.
«Jaqyn ýaqytta 600 páterli 4 turǵyn úi qurylysy aiaqtalady. Onyń ekeýi, iaǵni, 110 páter kópbalaly otbasylaryna, jetim balalar men ózge de sanattaǵy áleýmettik az qamtylǵan top ókilderine beriledi. Jalpy óńirde turǵyndardyń barlyq sanatyn sapaly ári qoljetimdi baspanamen qamtamasyz etý maqsatynda 443 myń sharshy metr turǵyn úi iske qosylady. 19 úi qoldanysqa berildi» dep atap ótti Danial Ahmetov.
Ýaqytsha Ana úiin panalap júrgen Sandýǵash Qasenovanyń ata-anasy erte ómirden ozǵan. Dúkende satýshy bolyp jumys isteitin jas ana qýanyshtan kózine jas alyp, qamqorlyǵyn aiamaǵan eline alǵysyn jetkizdi. Sonymen qatar baspanaly bolǵan ár páter iesine turmystyq tehnika satyp alýǵa arnaiy sertifikattar tabys etildi.
«Bizge baspana berip, qamqorlyq tanytyp jatqan memleketimizge, halqyma, oblys basshylyǵyga úlken alǵys bildiremin. Otbasymyzdyń taǵdyryna túsken qiyn kezeńde qoldaý kórsetip, qamqor boldy. Kóp rahmet!» deidi Sandýǵash Qasenova.
Jalpy, Shyǵys Qazaqstanda kópbalaly az qamtylǵan otbasylardy qoldaý sharalarynyń keshendi baǵdarlamasy iske asyrylýda. Aǵymdaǵy jyly kóp balaly otbasylar sanatynan kezekte turǵan 388 otbasy jeke turǵyn úimen qamtamasyz etildi.
