Jeltoqsan – qazaq úshin qasterli ai. Mundai pikirdi «Zeren» respýblikalyq lageriniń jabylý rásimine qatysýyna orai áleýmettik jelide pikir jazǵan QR Parlamenti Senatynyń tóraǵasy Máýlen Áshimbaev aitty, dep habarlaidy "Ult aqparat".
«Búgin «Zeren» respýblikalyq lageriniń jabylý rásimi ótti. Sonyń aiasynda elimizdiń bir top talantty jastarymen kezdesip, Táýelsizdiktiń qadir-qasieti, ony saqtaýdyń mańyzy jáne jeltoqsan aiynyń ult tarihyndaǵy orny jóninde sóz qozǵadyq. Shyn máninde, jeltoqsannyń halqymyz úshin qadiri bólek. Sebebi, Alash avtonomiiasynyń jariialanýy, 86-daǵy Jeltoqsan oqiǵasy, Tuńǵysh Prezidentimizdi sailaý, Táýelsizdikke qol jetkizý siiaqty eldik pen egemendikke bastaǵan mańyzdy oqiǵalar osy aida bolǵan. Tipti resmi túrde Aqmolaǵa astana mártebesi berilgen kún de jeltoqsannyń enshisinde. Sondyqtan jeltoqsan – qazaq úshin qasterli ai. Biz osylai ótkennen ónege ala otyryp, aldymyzda turǵan eń basty mindet Táýelsizdikti saqtaý jáne eldikti nyǵaitý ekenin tereń túsinýimiz kerek. Osy baǵytta jastarymyz belsendilik tanytyp, Otanǵa qyzmet etýdiń ozyq úlgisin kórsetý qajet dep esepteimin. Ol úshin bilik tutqasyn ustap, sheneýnik bolý mindetti emes. Eń bastysy, árkim sapaly bilim alyp, óz salasynda biik belesterdi baǵyndyrýy tiis. Eldiń damýyna qosylǵan eń úlken úles sol. Sebebi, jastardyń jeńisi – memleket jetistiginiń kepili. Sondyqtan óskeleń urpaq aldaryna naqty maqsattar qoiyp, eldik múdde jolynda aianbai eńbek etý kerek», - dep jazdy Senat tóraǵasy Facebook paraqshasynda.
Sonymen qatar ol týǵan el úshin eńbek etý – ár azamattyń qasietti boryshy ekendigin basa aitty.
«Tarihta aty qalǵan batyrlarymyzdyń erligi, HH ǵasyrdyń basyndaǵy Alash arystarynyń áreketi osyndai mártebeli mindetke taban tireidi. Soǵys jyldaryndaǵy, odan keiingi kezeńdegi býyn da ultty saqtap qalý úshin jumys istedi. Elbasy bastaǵan býyn táýelsiz Qazaqstandy quryp, memleket qalyptastyrdy. Nursultan Ábishuly osy mańyzdy mindetti ári qarai jalǵastyrý úshin el tizginin kelesi býynǵa amanat etip tapsyrdy. Búginde Prezidentimiz Qasym-Jomart Kemeluly Toqaevtyń bastamasymen memleketti órkendetý úshin aýqymdy jumys atqarylyp jatyr. Erteń kezek táýelsizdik jyldarynda týǵan jastarǵa keledi. Sondyqtan órenderimiz osy jaýapkershilikti búginnen bastap sezinip, amanatqa laiyqty urpaq bolyp qalyptasýy qajet», - dedi Máýlen Áshimbaev.⠀
Senat tóraǵasy Qazaqstanda talantty, otanshyl jastar óte kóp ekendigine basa nazar aýdarady.
«Búgin solardyń bir tobyn «Daryn» memlekettik jastar syilyǵymen saltanatty túrde marapattadyq. Syilyq iegerleriniń bári óz salasy boiynsha aitarlyqtai jetistikterge jetken, egemen elimizdiń órkendeýine óz úlesin qosyp kele jatqan alǵyr azamattar. Olardyń qatarynda bilikti jýrnalist Raýan Mynbaev, sportta el namysyn abyroimen qorǵap, qaisarlyǵymen talaiǵa úlgi bolǵan Jiger Kenjeǵaliev, dástúrli án ónerimizdi dáripteýde belsendiligimen tanylǵan Kúnsulý Túrikpen, klassikalyq mýzykanyń qyr-syryn jetik meńgergen Jibek Musyrǵalieva, qoǵamdyq jumysta alǵyrlyǵymen kózge túsip júrgen Maksim Spotkai siiaqty birqatar daryndy ini-qaryndastarymyz bar. Syilyq alǵan barlyq jastardy shyn júrekten quttyqtai otyryp, aldaǵy ýaqytta budan da biik shyńdardy baǵyndyra berýine tilektestigimdi bildiremin», - dedi ol.
