Ortalyq sailaý komissiiasynyń tóraǵasy Berik Imashev aldaǵy máslihat depýtattarynyń kezekti sailaýyna qatysty pikir bildirdi, dep habarlaidy QazAqparat.
«Sailaý zańnamasyna sáikes, máslihattar depýtattarynyń kezekti sailaýyn Ortalyq sailaý komissiiasy máslihattardyń ókilettik merzimi aiaqtalýynan keminde úsh ai buryn taǵaiyndaidy. Sailaý maslihattar depýtattarynyń konstitýtsiialyq ókilettik merzimi aiaqtalýyna keminde bir ai qalǵanda ótkizilýi tiis. 2016 jyly sailanǵan maslihattar depýtattarynyń ókilettigi 2021 jyly naýryzda aiaqtalady. Ózderińiz biletindei, 2018 jyly «Sailaý týraly» Konstitýtsiialyq zańǵa sailaý protsesindegi saiasi partiialardyń quqyqtaryn edáýir keńeite túsetin ózgerister engizildi. Zańǵa sáikes, máslihat depýtattary partiialyq tizimder boiynsha sailanady. Máslihattar depýtattaryn sailaýdyń proportsionaldy júiesine kóshý 2007 jylǵy konstitýtsiialyq reformanyń logikalyq jalǵasy bolyp sanalady. Sonymen birge, respýblikalyq jáne jergilikti deńgeilerde ókildi organdardy qurý jónindegi tásilderdi bir izge keltiredi», - dedi B. Imashev Ortalyq sailaý komissiiasynyń otyrysynda.
Sonymen qatar ol Ortalyq sailaý komissiiasy jańa formattaǵy máslihattar sailaýyna daiyndyq aiasynda saiasi partiialarmen ózara is-qimyl boiynsha barlyq qajetti sharalardy qabyldaǵanyn atap ótti.
«Memleket basshysy búgingi úndeýinde atap ótkendei, proportsionaldy model álemdik demokratiialyq tájiribege tolyq sai keledi, saiasi júieni nyǵaitýǵa, demokratiiany damytýǵa yqpal etedi. Búginde Parlament Májilisiniń 2007-2012 jáne 2016 jyldardaǵy úsh shaqyrylymy proportsionaldy júie boiynsha sailandy. Saiasi básekelestiktiń negizgi sýbektilerine ainalyp otyrǵan saiasi partiialar óńirlik deigeide de depýtattyq mandattar úshin kúreske nyq senimmen kirisýi úshin jetkilikti tájiribe jinady. Ortalyq sailaý komissiiasy jańa formattaǵy máslihattar sailaýyna daiyndyq aiasynda saiasi partiialarmen ózara is-qimyl boiynsha barlyq qajetti sharalardy qabyldady, osydan eki jyl buryn Aqparat jáne qoǵamdyq damý ministrligimen birlesip otyrys ótkizgen bolatyn. Onda barlyq saiasi partiialarǵa jarǵylyq qujattaryn zańnamanyń jańa normalaryna sáikestendirý qajettigi týraly habarlanǵan. Saiasi partiialardyń sailaýǵa daiyndyq ýaqyty jetkilikti boldy», - dedi OSK tóraǵasy.
Aita keteiik, Memleket basshysy Qasym-Jomart Toqaev QR Parlamenti Májilisi jáne máslihat depýtattary sailaýyn taǵaiyndaý týraly úndeý jariialady.
«Búgin men Parlament Májilisi depýtattarynyń sailaýyn taǵaiyndaý týraly Jarlyqqa qol qoidym. Ortalyq sailaý komissiiasynyń qaýlysymen barlyq deńgeidegi máslihat depýtattarynyń sailaýy taǵaiyndalady. Aldaǵy sailaý konstitýtsiialyq merzimge sáikes, 2021 jyldyń 10 qańtarynda ótedi. Barlyq saiasi partiialardyń bul sailaý naýqanyna qatysýǵa daiyndalýyna, sailaý aldyndaǵy platformasyn ázirleýine, partiialyq infraqurylymdardy jetildirýine ýaqyty jetkilikti boldy. Ortalyq sailaý komissiiasy men Bas prokýratýra sailaýdyń zańdylyǵyn, ashyqtyǵyn jáne ádildigin saqtaý úshin turaqty baqylaý júrgizip otyrady», - dedi Prezident.
