Reseidiń Orynbor oblysynyń Elek aýdanynda federaldyq magistraldy gaz qubyrynda jarylys boldy. Bul týraly aimaq basshysynyń baspasóz qyzmeti habarlady. Gaz qubyry "Gazprom transgaz Ekaterinbýrg" kompaniiasyna tiesili.
"Federaldyq magistraldy gaz qubyrynda bolǵan jarylystan eshkim zardap shekpedi, eshteńe qiraǵan joq. Apat aýmaǵy eldi mekenderden alys jerde jatyr. Aqparat boiynsha, bul Orynbor - Novopskov gaz qubyrynyń bir tarmaǵy. Magistraldy gaz qubyry Elek aýdany, Orynbor men Sol-Iletsk aýdanynyń bir bóligin gazben qamtamasyz etedi jáne Qazaqstanǵa gaz jetkizedi" delingen gýbernatordyń baspasóz habarlamasynda.
Resei energetika ministrligi keiinirek apattyń saldarynan Qazaqstanǵa gaz tasymaldaý toqtatylǵanyn habarlady. Ministrliktiń málimetinshe, "Soiýz" gaz qubyrynyń 108-shaqyrymynda gaz qysymy túsip ketip, izinshe aýada janǵan. Qazir ol aýmaqta gaz janý toqtamaǵan. Tutynýshylarǵa Orynbor - Novopskov gaz qubyry ballondary arqyly "kógildir otyn" tasymaldanady.
Nur-Sultan ýaqyty boiynsha saǵat 15.00-ge taman Orynbor gýbernatorynyń baspasóz qyzmeti gaz qubyry bitelgenin, aýmaqty jóndeýge eki kún ketetinin habarlady.
Qazaqstan energetika ministrligi bir bóligi Qazaqstan aýmaǵy arqyly ótetin "Soiýz" jáne "Orynbor - Novopskov" magistraldy gaz qubyrlary boiynsha gaz tasymaldaý toqtatylǵanyn aitty. Sáikesinshe, Resei gazy men Orynbor zaýytynan Qarashyǵanaq gazyn tasymaldaý da toqtatylǵanyn rastady. Onyń negizgi tutynýshysy - Batys Qazaqstan oblysy.
"Batys Qazaqstan oblysynyń tutynýshylaryn gazben qamtamasyz etý úshin "Orta Aziia - Ortalyq" gaz qubyrynyń resýrstaryn baǵyttaý jumystary júrgizilip jatyr. Qazaqstandaǵy barlyq gaz-kólik júiesi qalypty rejimde jumys istep jatyr. Jaǵdaidy Qazaqstan energetika ministrligi baqylaýda ustap otyr" dedi vedomstvo ókilderi.
