Almaty oblysynyń Panfilov aýdanynda dala órtin óshirmek bolyp, jan tapsyrǵan Qanat Úsenbekov pen Erkinbek Ospanovtyń artynda 10 balasy jetim, jarlary jesir qaldy. Eki er azamattyń da bes balasy bar, dep habarlaidy QazAqparat tilshisi.
Qanat Úsenbekov Panfilov aýdandyq ákimdiginde kólik júrgizýshi bolyp jumys istegen. Qaiǵyly jaǵdai bolǵan sátte ol eńbek demalysynda júrgen. Ákesiniń aitýynsha, Qanat órtti óshirýge erikti bolyp barǵan.
«Bizde meshit salyp jatyr. Meshit salǵanda meshitke zal salǵanbyz. Tapqan aqshamyzdy sol zalǵa kómek beremiz dep barǵan bolatyn. Olar jeke aqsha tabamyz, jeke aqsha alamyz dep barǵan joq», - dedi Marqum Qanat Úsenbekovtiń ákesi Aryp Úsenbekov.
Dala órtin óshirip, tapqan aqshasyn meshittiń qurylysyna qosýǵa niettengen 35 jastaǵy Qanat qyzyl jalynnyń ortasynda jan tapsyrdy. Marqumnyń artynda bes birdei balasy, jary qaldy. Úlkeni 12 de bolsa, kishisi birge endi keledi eken. Marqum kúni keshe ǵana kenjesiniń toiyna daiyndalyp, qoiyn da alyp qoiypty. Biraq ol qoi toiǵa buiyrmady dep týystary egilip jylaýda.
«Úsh qoi alyp, qyzynyń bir jas toiyn jasaimyn degen bala ǵoi. Qalaisha daiyndyqsyz, eshqandai órtke qarsy tura almaityn, eshqandai instrýtsiiadan ótpegen balalardy qalaisha ol jaqqa jiberip qoiady. Úkimet tarapynan aitý kerek qoi, sender daiyn emessińder, qalai barasyńdar dep aitý kerek qoi», - dep kúiinedi marqum Qanat Úsenbekovtyń týysy Tolqyn Qusaiynova.
Qaza bolǵan jandardyń biri Lesnovka aýylynyń 51 jastaǵy turǵyny Aitqazy Nemeltaev. Ákimdiktiń málimetinshe, marqum otbasyn qurmaǵan, jumyssyz. Al ormanshy bolyp jumys istegen 32 jastaǵy Erkinbek Ospanovtyń da artynda bes balasy, jary qaldy.
Esterińizge sala keteiik, 5 tamyr kúni Panfilov aýdanynda dala órtin óshiremin dep qaza tapqan úsh adamnyń ekeýi búgin jer qoinyna tapsyryldy. Buǵan deiin, órtten úsh adamnyń qaza taýyp, 7 adamnyń zardap shekkenin habarlaǵan bolatynbyz. Almaty oblysy ákiminiń baspasóz Ǵalymurat Júkeldiń málimetinshe, marqum bolǵan úsh azamat memlekettik nagradaǵa usynylady.
