Foto: parlam.kz
Májilis tóraǵasy Erlan Qoshanov BAQ ókilderine bergen suhbatynda Abai oblysyndaǵy órttiń sebebi, Qostanai tragediiasynan tiisti organdardyń nege sabaq almaǵany týraly pikir bildirdi, dep habarlaidy QazAqparat.
«Ókinishke qarai, osyndai jaǵdailar bolyp turady. Ásirese osy orman órti salasynda biyl óte úlken bir jaǵdai boldy dep aita alamyz. Ókinishke qarai, kóptegen azamatymyzdan, arystardan aiyrylyp qaldyq. Osy múmkindikti paidalanyp taǵy da Májilis depýtattary atynan qaitys bolǵan azamattardyń otbasyna, jaqyndaryna qaiǵyryp, kóńil aitamyn. Órt, sý – tilsiz jaý deidi. Apat aityp kelmeidi ǵoi. Biraq sol tosynnan bolǵan jaǵdaiǵa, apattarǵa tosqaýyl qoiý da ońai emes. Biz onyń qai kúni, qai jerden kelip qalatynyn da bilmeimiz. Memleketimiz úlken, aýmaǵy úlken, ózińiz bilesiz. Biraq sonda da, adamnyń ómirine qatysty bolǵan kezde, eldi mekenderdiń jaǵdaiyna qatysty bolǵan kezde, árine, bizdiń tiisti qyzmet kórsetetin organdarymyz, tiisti mamandar, jaýapty tulǵalar, saqadai sai bolýǵa tiis. Ókinishke qarai, bul jaǵdai búginde oryn almai otyr. Bul týraly keshe Prezidentimiz óziniń baǵasyn berdi», - dedi Májilis spikeri.
Sondai-aq, ol búginde osy másele boiynsha kópshilikti alańdatyp otyrǵan saýaldarǵa toqtaldy.
«Suraq kóp. Eń birinshi suraq, munyń sebebi neden? Kim ormandy otqa orady? Ekinshiden, osy azamattardy, tipti órtpen kúresýge daiyn emes azamattardy, qoldarynda quraly, tehnikasy joq, ózderiniń kóligimen birge sol otqa kim aidap saldy? Oǵan kim buiryq berdi? Bul da suraq. Negizgi kinálilerdi quzyretti organdar tekserip, tergep jatyr. Sonyń qorytyndysynda bilemiz dep oilaimyn», - dedi Erlan Qoshanov.
