فوتو: parlam.kz
مەجٸلٸس تٶراعاسى ەرلان قوشانوۆ باق ٶكٸلدەرٸنە بەرگەن سۇحباتىندا اباي وبلىسىنداعى ٶرتتٸڭ سەبەبٸ, قوستاناي تراگەديياسىنان تيٸستٸ ورگانداردىڭ نەگە ساباق الماعانى تۋرالى پٸكٸر بٸلدٸردٸ, دەپ حابارلايدى قازاقپارات.
«ٶكٸنٸشكە قاراي, وسىنداي جاعدايلار بولىپ تۇرادى. ەسٸرەسە وسى ورمان ٶرتٸ سالاسىندا بيىل ٶتە ٷلكەن بٸر جاعداي بولدى دەپ ايتا الامىز. ٶكٸنٸشكە قاراي, كٶپتەگەن ازاماتىمىزدان, ارىستاردان ايىرىلىپ قالدىق. وسى مٷمكٸندٸكتٸ پايدالانىپ تاعى دا مەجٸلٸس دەپۋتاتتارى اتىنان قايتىس بولعان ازاماتتاردىڭ وتباسىنا, جاقىندارىنا قايعىرىپ, كٶڭٸل ايتامىن. ٶرت, سۋ – تٸلسٸز جاۋ دەيدٸ. اپات ايتىپ كەلمەيدٸ عوي. بٸراق سول توسىننان بولعان جاعدايعا, اپاتتارعا توسقاۋىل قويۋ دا وڭاي ەمەس. بٸز ونىڭ قاي كٷنٸ, قاي جەردەن كەلٸپ قالاتىنىن دا بٸلمەيمٸز. مەملەكەتٸمٸز ٷلكەن, اۋماعى ٷلكەن, ٶزٸڭٸز بٸلەسٸز. بٸراق سوندا دا, ادامنىڭ ٶمٸرٸنە قاتىستى بولعان كەزدە, ەلدٸ مەكەندەردٸڭ جاعدايىنا قاتىستى بولعان كەزدە, ەرينە, بٸزدٸڭ تيٸستٸ قىزمەت كٶرسەتەتٸن ورگاندارىمىز, تيٸستٸ ماماندار, جاۋاپتى تۇلعالار, ساقاداي ساي بولۋعا تيٸس. ٶكٸنٸشكە قاراي, بۇل جاعداي بٷگٸندە ورىن الماي وتىر. بۇل تۋرالى كەشە پرەزيدەنتٸمٸز ٶزٸنٸڭ باعاسىن بەردٸ», - دەدٸ مەجٸلٸس سپيكەرٸ.
سونداي-اق, ول بٷگٸندە وسى مەسەلە بويىنشا كٶپشٸلٸكتٸ الاڭداتىپ وتىرعان ساۋالدارعا توقتالدى.
«سۇراق كٶپ. ەڭ بٸرٸنشٸ سۇراق, مۇنىڭ سەبەبٸ نەدەن? كٸم ورماندى وتقا ورادى? ەكٸنشٸدەن, وسى ازاماتتاردى, تٸپتٸ ٶرتپەن كٷرەسۋگە دايىن ەمەس ازاماتتاردى, قولدارىندا قۇرالى, تەحنيكاسى جوق, ٶزدەرٸنٸڭ كٶلٸگٸمەن بٸرگە سول وتقا كٸم ايداپ سالدى? وعان كٸم بۇيرىق بەردٸ? بۇل دا سۇراق. نەگٸزگٸ كٸنەلٸلەردٸ قۇزىرەتتٸ ورگاندار تەكسەرٸپ, تەرگەپ جاتىر. سونىڭ قورىتىندىسىندا بٸلەمٸز دەپ ويلايمىن», - دەدٸ ەرلان قوشانوۆ.
