Almaty oblysyndaǵy Qapshaǵai sý qoimasynyń mańynan kámeletke tolmaǵan qyzdyń órtengen denesi tabyldy, dep habarlaidy Ulysmedia.kz.
Oblystyq politsiia departamentiniń dereginshe, 2005 jyly týǵan qyzdyń joǵalǵany týraly aryz 27 mamyrda kelip túsken. Anasy qyzynyń 24 mamyr kúni úiden shyǵyp, qaityp oralmaǵanyn aitqan.
Qyzdyń qaida ekenin anyqtaý úshin jedel-tergeý toby qurylǵan. Top qyzdyń joǵalýyna qatysy bolýy múmkin azamattardy anyqtaǵan. Olar – 1992 jyly týǵan K. esimdi jáne 2001 jyly týǵan B. esimdi azamattar. Ekeýi qyzben joǵalyp ketken kúni kóshede tanysqan.
Almaty oblysynyń turǵyndary qyzdy óltirgenderin moiyndap, Qapshaǵai sý qoimasy mańynda jerlegen oryndy kórsetken. Er adamdar qylmys izin jasyrý úshin máiitti órtep jibergen.
Qyzdyń ne sebepti ólgenin anyqtaý úshin sot-meditsinalyq saraptama taǵaiyndalǵan.
