2026 jylǵy 23 maýsymda Almaty oblysynyń Kegen aýdanyndaǵy taýly aýmaqtan 37 jastaǵy politsiia qyzmetkeriniń órtengen máiiti tabyldy, dep habarlaidy ult.kz.
Onyń jeke basy anyqtalyp, Almaty qalasynyń Áýezov aýdandyq politsiia basqarmasyndaqyzmet etkeni rastaldy.
Tergeý nusqasy boiynsha, qylmys Almaty qalasyndaǵy páterde bolǵan bolýy múmkin. Keiin máiit qylmystyń izin jasyrý maqsatynda Kegen aýdanyna jetkizilip, órtelgen degen boljam qarastyrylyp jatyr. Bul – tergeýdiń aldyn ala nusqasy.
Politsiia qylmystyq is qozǵap, marqumnyń jubaiy men ulyn ustaǵanyn resmi habarlady. Keiin birqatar BAQ taǵy bir kámeletke tolmaǵan kúdiktiniń baryn jazdy. Tergeý jalǵasýda, sondyqtan barlyq mán-jai sotta anyqtalady.
BAQ málimetinshe, marqum politsiia organdarynda 15 jyldan astam qyzmet etken jáne artynda jeti balasy qalǵan.
Kórshisiniń aitýynsha, otbasy tynysh ómir súrgen, kóbine jumysta bolǵan, al kórshiler balalaryn anda-sanda ǵana balkonnan kóretinin aitqan. Kórshilerdiń sózinshe, tergeýshiler olardan «eshqandai daýys nemese janjal estidińizder me?» dep suraǵan, alaida eshkim mundai jaǵdaidy baiqamaǵanyn jetkizgen.
Marqum politsiia qyzmetkeri Aslan Álserovtiń burynǵy áriptesi ony kásibi jáne talapshyl qyzmetker retinde sipattaǵan. Onyń aitýynsha áriptesteri Aslandy esimimen emes, kóbine «Basar» nemese «Slepoi» dep ataityn. Ol páter urlyǵy qylmystaryn ashýda óte tájiribeli jedel ýákil bolǵan, qaladaǵy úzdik qyzmetkerlerdiń biri sanalǵan.
Qyzmet barysynda birneshe ret qylmyskerlerdiń shabýylyna ushyraǵan. Áriptesiniń aitýynsha, oǵan pyshaq salynǵan, oq atylǵan, sondai-aq jaq súiegi men murny synǵan jaǵdailar bolǵan. Soǵan qaramastan jumysyn jalǵastyrǵan.
