Almaty oblysynyń Kegen aýdanyndaǵy taýly aimaqta denesi órtengen kúide tabylǵan 37 jastaǵy politsiia qyzmetkeri Aslan Álserovtiń ólimine qatysty tergeý jalǵasyp jatyr, dep habarlaidy ult.kz.
Osy is qoǵamda keń talqylanyp jatqan tusta marqumnyń burynǵy áriptesi onyń qyzmettegi bolmysy men otbasy týraly pikir bildirdi
Eki jyl buryn Álserovter otbasy «Qaiyrly tań Qazaqstan» baǵdarlamasyna qatysyp, kópshilikke politsiia salasyndaǵy úlgili januia retinde tanystyrylǵan edi. Efir barysynda erli-zaiypty tanystyq tarihyn, otbasy qundylyqtaryn jáne jeti balany tárbieleýdegi ustanymdaryn aityp bergen.
Baǵdarlamada Aslan Álserov eńbek jolyn 2008 jyly Almaty qalasynyń patrýldik politsiiasynda bastaǵanyn, bolashaq jary Arailymmen qyzmet barysynda tanysqanyn aitqan. Al jubaiy Arailym Álserova ony sabyrly minezi men batyldyǵy úshin tańdaǵanyn jetkizgen.
Sondai-aq efirde olardyń sportty ómir saltyna ainaldyrǵan otbasy ekeni kórsetilgen. Aslan grek-rim kúresimen ainalyssa, Arailym djiý-djitsýdan Qazaqstannyń alty dúrkin chempiony ekenin aitqan. Olar balalaryn da sportqa baýlyp, uldarynyń halyqaralyq jarystarda jetistikke jetkenin, qyzdarynyń da sport pen shyǵarmashylyqqa qyzyǵatynyn maqtanyshpen bólisken. Úlken qyzdary ákesin talapshyl, anasyn meiirimdi ári sabyrly jan retinde sipattaǵan.
Alaida araǵa eki jyl salyp, syrt kózge berekeli kóringen otbasy aýyr qaiǵyly oqiǵanyń ortasynda qaldy. Tergeý nusqasyna sáikes, qylmys Almaty qalasynda jasalyp, keiin máiit Almaty oblysynyń Kegen aýdanyndaǵy taýly jerge jetkizilgen bolýy múmkin. Is boiynsha marqumnyń jubaiy, kámeletke tolmaǵan uly jáne taǵy birneshe adam kúdikke ilingen. Keiin kámeletke tolmaǵan kúdiktilerge úiqamaq túrindegi bultartpaý sharasy qoldanyldy. Al qorǵaýshylar olardyń uzaq jyldar boiy otbasyndaǵy júieli zorlyq-zombylyqtyń qurbany bolýy múmkin ekenin málimdegen.
Marqummen birge qyzmet atqarǵan burynǵy áriptesi Jiger (aty ózgertilgen) Aslan Álserovtiń kásibi deńgeii joǵary bolǵanyn aitady.
Onyń sózinshe, áriptesteri arasynda Aslan kóbine «Basar» nemese «Slepoi» degen laqap atpen tanylǵan. Ol páter urlyǵy qylmystaryn ashýda tájiribeli maman sanalyp, kóptegen qaýipti operatsiialarǵa qatysqan. Burynǵy áriptesi onyń qyzmet barysynda birneshe ret shabýylǵa ushyrap, pyshaq jaraqatyn alǵanyn, oq atylǵanyn, sondai-aq jaq súiegi men murny synǵan jaǵdailar bolǵanyn aitty.
Jigerdiń aitýynsha, Aslan Álserov óte tártipti, jaýapkershiligi joǵary ári sportty erekshe qadirlegen adam bolǵan. Ol ózin ǵana emes, balalaryn da sportqa baýlyp, olardyń kásibi jetistikterine erekshe mán bergen.
Sonymen qatar burynǵy áriptesi onyń eshqashan ashýshań nemese psihologiialyq turǵydan turaqsyz adam retinde kórinbegenin aitty. Kerisinshe, ony sabyrly, bes ýaqyt namazyn oqityn, dindar azamat retinde sipattady. Degenmen, balalaryna qatysty talaptarynyń qatań bolǵanyn jasyrmady.
«Balalarynyń kún tártibi óte naqty bolatyn. Mektepten keiin sabaq oqyp, keiin jattyǵýǵa ketetin. Eger jattyǵýdy sebepsiz jiberip alsa, soǵan qatty renjitin. Biraq ony ozbyr nemese tiran áke boldy dep naqty aita almaimyn. Bul oqiǵa men úshin de kútpegen jaǵdai boldy», – dedi ol.
