Almaty oblysy Kegen aýdanynyń taýly aimaǵynda denesi órtengen kúide tabylǵan 37 jastaǵy aǵa jedel ýákil Aslan Álserovtiń ólimine qatysty tergeý júrip jatqan tusta, marqumnyń burynǵy áriptesi otbasyndaǵy jaǵdai men qaiǵyly oqiǵanyń sebepteri týraly aitty, dep habarlaidy Ult.kz Stan.kz saityna siltep.
Osydan eki jyl buryn Álserovter otbasy «Qaiyrly tań Qazaqstan» baǵdarlamasyna qatysyp, kópshilikke politsiia qyzmetkerleri arasyndaǵy úlgili januia retinde tanystyrylǵan bolatyn.
Erli-zaiypty telearna efirinde jeti balasymen birge tanysý tarihyn, otbasy qundylyqtaryn jáne bala tárbiesindegi ustanymdaryn ashyq bólisken edi. Baǵdarlamada Aslan Álserov 2008 jyly Almaty qalasynyń patrýldik politsiia qyzmetinen eńbek jolyn bastaǵanyn, al bolashaq jary Arailymmen qyzmet barysynda tanysyp, ekeýin osy sala tabystyrǵanyn aitqan. Óz kezeginde jubaiy Arailym Álserova Aslandy batyldyǵy men sabyrly minezi úshin tańdaǵanyn jetkizgen.
«Maǵan bári boiy uzyn, symbatty jigitti tańdadyń deitin, negizi ózi óte salmaqty bolatyn, ózim de sondai minezdi adamdardy unatamyn», – dedi Arailym Álserova sol efir barysynda.
Baǵdarlamada olardyń sportty ómir saltyna ainaldyrǵan otbasy ekeni de kórsetilip, Aslan grek-rim kúresimen ainalysatynyn aitsa, Arailym ózin djiý-djitsýdan Qazaqstannyń alty dúrkin chempiony retinde tanystyrǵan. Erli-zaiypty jeti bala tárbielep otyrǵanyn aityp, uldarynyń djiý-djitsý, dziýdo jáne sambodan álem chempiondary ekenin, al qyzdarynyń sport pen shyǵarmashylyqqa jaqyn ekenin maqtanyshpen jetkizgen bolatyn.
Baǵdarlamada sóz sóilegen úlken qyzdary ákesin "kishkene qataldaý", al anasyn "óte sypaiy, bárimizge jaqsy qaraityn jan" dep sipattaǵan.
Jumys barysynda áriptesteri Aslan Álserovti sabyrly, kúizelisti jaǵdaida ózin joǵaltpaityn bilikti qyzmetker dep sipattasa, Arailym Álserovany jas mamandarǵa baǵyt-baǵdar beretin tájiribeli áriptes retinde baǵalaǵan. Alaida arada nebári eki jyl ótkende syrt kózge úlgili bolyp kóringen osy otbasynyń taǵdyry kútpegen jerden qaiǵyly arnaǵa burylyp, Almaty qalasy Áýezov aýdandyq politsiia basqarmasynyń aǵa jedel ýákili Aslan Álserovtiń kúiip ketken máiiti Almaty oblysy Kegen aýdanyndaǵy taýly aimaqtan tabyldy.
Tergeý nusqasy boiynsha qylmys Almaty qalasynda jasalǵan, al kúdikke marqumnyń jubaiy, kámeletke tolmaǵan uly jáne taǵy birneshe adam ilingen. Keiin kámeletke tolmaǵan kúdiktilerge úiqamaq túrindegi bultartpaý sharasy qoldanyldy, al qorǵaýshylar olardyń uzaq jyldar boiy otbasyndaǵy júieli zorlyq-zombylyqtyń qurbany bolýy múmkin ekenin málimdedi.
Osy rezonansty iske qatysty Aslan Álserovtiń burynǵy áriptesi Jiger (aty ózgertilgen) marqumdy qyzmette qandai adam retinde tanyǵanyn jáne tergeý barysyna qatysty kózqarasyn bildirdi.
«Eń áýeli, oqiǵa týraly málimetti kórgende, óltirilgen adamnyń Aslan ekenin birden túsinbedim, óitkeni biz ony eshqashan atymen atai bermeitinbiz. Qaladaǵy áriptester arasynda ony kóbine Basar nemese Slepoi dep ataitynbyz, ózi de ózin únemi Slepoimyn dep tanystyratyn, nege dál solai atalǵanyn bilmeimin, jai ǵana solai qalyptasqan. Páter urlyǵy isterin ashýda ol naǵyz kásibi maman edi, qylmyskerlerdi ustaýda óte myqty edi, qaladaǵy eń tájiribeli jedel ýákilderdiń biri sanaldy, ustalǵan kúdiktilerdiń sany da kóp edi. Oǵan birneshe ret qastandyq jasaldy, pyshaqtaǵan, oq atqan, jaq súiegin syndyrǵan, murnyn syndyrǵan jaǵdailar bolǵan», – dedi Aslan Álserovtiń burynǵy áriptesi.
Burynǵy áriptesi marqumdy qyzmetine jaýapkershilikpen qaraityn, tártipti ári sportty ómir saltyna ainaldyrǵan azamat retinde sipattady.
«Adam retinde men ony óte sabyrly, biraq ózine de, ózgelerge de óte talapshyl jan retinde este saqtaimyn, onyń ómirinde sport árdaiym birinshi orynda turdy. Ózi de sportpen shuǵyldanatyn, al balalaryn da sportqa baýlydy, Instagram jelisindegi paraqshalarynan baiqaǵanymdai, balalary da sportshy. Úlken uly djiý-djitsýdan Aziia chempiony bolǵan, ekinshi asyrap alǵan balasy da sportpen ainalysty, boiy uzyn, shamamen 187 santimetr deneli, bulshyq etteri jaqsy damyǵan jigit edi», – dedi áriptesi Jiger.
Áriptesiniń aitýynsha, ol marqumdy eshqashan ashýshań nemese aqyl-esi turaqsyz adam retinde kórmegen, kerisinshe, onyń dindar, sabyrly bolǵanyn, biraq balalaryna óte talapshyl áke bolǵanyn alǵa tartty.
«Kórshilerdiń aitqany jóninde eshteńe bilmeimin, biraq onyń balalarǵa óte talapshyl bolǵanyn bilemin, olardyń kún tártibi qatań edi. Túske deiin mektepte bolatyn, tústen keiin sabaqtaryn oqityn, keiin jattyǵýǵa ketip, keshki saǵat 10 shamasynda ǵana úige oralatyn, olar kúres, dziýdo, djiý-djitsýmen ainalysty. Eger balalar jattyǵýdy jiberip alsa, ol áke retinde soǵan qatty alańdap, ashýlanatyn, ony ozbyr, tiran áke boldy dep aitýǵa bola ma, bilmeimin. Bul jańalyqty estigende men ózim de qatty tańǵaldym, ony aqyl-esi turaqsyz nemese ashýshań adam dep aita almaimyn. Biz birge qyzmet etken kezde, kerisinshe, óte sabyrly boldy, bes ýaqyt namazyn oqityn, dindar, durys adam edi», – dedi burynǵy áriptesi.
