Almaty oblysynda órtengen kúii tabylǵan politsiia qyzmetkeri Aslan Álserovtiń ólimine qatysty tergeý barysynda jańa málimetter belgili boldy, dep habarlaidy ult.kz.
Marqumnyń jubaiy da buǵan deiin politsiia salasynda eńbek etken. Alaida ol biylǵy aqpan aiynda qyzmetinen ketken. Týystarynyń aitýynsha, maior Aslan Álserov otbasynda jii janjal shyǵaryp, áieline birneshe ret kúsh kórsetken. Áieli denesindegi jaraqat izderin kórsetip, birneshe márte Bostandyq aýdandyq politsiia basqarmasyna júgingenimen, bul boiynsha naqty shara qoldanylmaǵany aitylyp otyr.
Tergeý málimetine sáikes, qaiǵyly oqiǵa bolǵan kúni politsiia qyzmetkeri úiine kesh qaitqan. Úide ustara júzine bailanysty týǵan daý janjalǵa ulasyp, arty tóbeleske ainalǵan. Sol sátte úige erli-zaiyptylardyń 15 jastaǵy eki uly men olardyń 14 jastaǵy dosy kirgen. Tergeý nusqasy boiynsha, jasóspirimderdiń biri ákesiniń basynan aýyr zatpen soqqy jasaǵan.
Odan keiin es-tússiz jatqan er adamnyń qol-aiaǵyn kiimmen bailap qoiǵan. Tergeý derekterine súiensek, kúdiktiler máiitti tún ishinde kópqabatty úidiń aýlasynda turǵan kólikke shyǵaryp, kórpege nemese jaimaǵa orap alyp ketken.
Keiin kólik Almaty oblysynyń Kegen aýdanyndaǵy aýyldardyń biri arqyly ótip, Kókpek – Kóktal – Kegen tas jolynan shamamen jarty shaqyrymdai taýǵa qarai júrgen. Tergeý boljamynsha, máiit dál sol jerde órtelgen.
Qazirgi ýaqytta marqumnyń jubaiy, eki uly jáne olardyń 14 jastaǵy dosy kúdikti retinde qamaýǵa alynǵan. Tergeý jalǵasyp jatyr, al oqiǵanyń barlyq mán-jaiyn quqyq qorǵaý organdary anyqtaýda.
