Elimizdiń Ortalyq sailaý komissiiasy Qazaqstan Respýblikasy Prezidenttigine jeti kandidatty tirkedi, dep habarlaidy QazAqparat tilshisi.
Búgin QR Ortalyq sailaý komissiiasy úsh úmitkerge, atap aitqanda Tóleýtai Rahymbekovke, Jambyl Ahmetbekovke jáne Ámirjan Qosanovqa QR Prezidenttigine kandidat kýáligin tabys etti. Al buǵan deiin respýblikanyń joǵary memlekettik laýazymyna úmitker retinde Qasym-Jomart Toqaev, Sádi-Bek Túgel, Amangeldi Taspihov jáne Daniia Espaeva tirkelgen bolatyn.
Esterińizde bolsa, osy jyldyń 9 sáýirinde Memleket basshysy Qasym-Jomart Toqaev respýblikalyq telearnalardan Qazaqstan halqyna úndeý jariialap, onda biylǵy 9 maýsymda elimizde kezekten tys prezidenttik sailaý ótetindigin málimdedi.
QR Ortalyq sailaý komissiiasy usynǵan prezident sailaýyn uiymdastyrý men ótkizý jónindegi sharalardyń kúntizbelik josparyna sáikes Qazaqstan Respýblikasynyń Prezidenttigine kandidattardy usyný sailaý taǵaiyndalǵan kúnnen keiingi kúni, iaǵni 2019 jylǵy 10 sáýirde bastalyp, 28 sáýirde jergilikti ýaqyt boiynsha saǵat 18.00-de aiaqtalady.
«Qazaqstan Respýblikasyndaǵy sailaý týraly QR Konstitýtsiialyq zańynyń 55-baby 1-tarmaǵyna sáikes Prezidenttikke kandidattardy usyný quqyǵy belgilengen tártippen tirkelgen respýblikalyq qoǵamdyq birlestikterge tiesili. Prezidenttikke kandidattardy qoǵamdyq birlestikter atynan olardyń joǵary organdary usynady. 28 sáýirde QR Ortalyq sailaý komissiiasy QR Prezidentiniń kezekten tys sailaýyna kandidattardy usyný qorytyndysyn jariia etti. Oǵan sáikes 9 respýblikalyq qoǵamdyq birlestiktiń, onyń ishinde 4 saiasi partiianyń kandidaty qujattaryn tapsyrdy.
Osylaisha, QR Prezidenttigine 9 úmitker usynyldy:
1. Sádi-Bek Túgel: «Uly dala qyrandary» respýblikalyq qoǵamdyq mádeni-áleýmettik birlestigi 2019 jyldyń 17 sáýirinde usynyp, QR OSK-ge qujattaryn 22 sáýirde tapsyrǵan;
2. Toqaev Qasym-Jomart Kemeluly: «Nur Otan» partiiasy qoǵamdyq birlestigi 2019 jyldyń 23 sáýirinde usynyp, QR OSK-ge qujattaryn 23 sáýirde tapsyrǵan;
3. Taspihov Amangeldi Satybaldyuly: «QR Kásipodaqtar federatsiiasy» respýblikalyq kásipodaqtar birlestigi 2019 jyldyń 24 sáýirinde usynyp, QR OSK-ge qujattaryn 25 sáýirde tapsyrǵan;
4. Espaeva Daniia Mádiqyzy: «Aq jol» Qazaqstannyń demokratiialyq partiiasy» qoǵamdyq birlestigi 2019 jyldyń 25 sáýirinde usynyp, QR OSK-ge 25 sáýirde tapsyrǵan;
5. Rahymbekov Tóleýtai Sataiuly: «Aýyl» halyqtyq-demokratiialyq patriottyq partiiasy» qoǵamdyq birlestigi 2019 jyldyń 25 sáýirinde usynyp, QR OSK-ge qujattaryn 26 sáýirde tapsyrǵan;
6. Ahmetbekov Jambyl Aýjanuly: «Qazaqstannyń kommýnistik halyq partiiasy» qoǵamdyq birlestigi 2019 jyldyń 26 sáýirinde usynyp, QR OSK-ge qujattaryn 26 sáýirde tapsyrǵan;
7. Qosanov Ámirjan Saǵidrahmanuly: «Ult taǵdyry» respýblikalyq qoǵamdyq birlestigi 2019 jyldyń 26 sáýirinde usynyp, QR OSK-ge qujattaryn 27 sáýirde tapsyrǵan;
8. Erǵaliev Talǵat Faizýllauly: «Qazaqstan Qurylysshylar odaǵy» respýblikalyq zańdy tulǵalar birlestigi 2019 jyldyń 26 sáýirinde usynyp, QR OSK-ge qujattaryn 27 sáýirde tapsyrǵan;
9. Jumatai Áliev: «Halyq demografiiasy» qoǵamdyq birlestigi 2019 jyldyń 26 sáýirinde usynyp, QR OSK-ge qujattaryn 28 sáýirde tapsyrǵan.
Alaida, 29 sáýirde «Qazaqstan Qurylysshylar odaǵy» respýblikalyq zańdy tulǵalar birlestigi atynan kandidat retinde usynylǵan Talǵat Erǵaliev saiasi dodaǵa qatyspaityndyǵyn málimdedi.
2 mamyrda QR Ortalyq sailaý komissiiasy «Halyq demografiiasy» qoǵamdyq birlestiginen prezidenttikke úmitker retinde usynylǵan Jumatai Álievti kandidat retinde tirkeýden bas tartty. Sebebi lingvistikalyq komissiia Jumatai Álievtiń memlekettik tildi erkin meńgermegendigi jóninde sheshim qabyldaǵan edi.
Osylaisha, búgin elimizdiń Ortalyq sailaý komissiiasy QR Prezidenttigine kandidat retinde usynylǵan 9 úmitkerdiń 7-eýin sailaý zańnamasy talaptaryna sai dep tanydy.
