Referendým biýlletenderi 28 mamyrǵa deiin daiyn bolady. Bul týraly elordada Ortalyq referendým komissiiasynyń otyrysynda málim boldy, dep habarlaidy QazAqparat.
«Respýblikalyq referendým týraly» QR Konstitýtsiialyq Zańynyń 27-babyna sáikes, daýys berýge arnalǵan biýlletenderdi daiyndaý tártibin Ortalyq referendým komissiiasy belgileidi. Ýchaskelik referendým komissiialary daýys beriletin kúnnen keminde jeti kún buryn biýlletendermen qamtamasyz etiledi», - dedi QR Ortalyq sailaý komissiiasynyń hatshysy Muhtar Erman.
Taratylǵan málimetke qaraǵanda, Konstitýtsiialyq zańda belgilengen tártippen respýblikalyq referendýmǵa qatysýǵa quqyǵy bar azamattardyń tizimderi referendým komissiiasyna usynylyp, tiisti ákimniń qoly qoiyldy.
«Oblystardyń, Nur-Sultan, Almaty, Shymkent qalalary ákimdikteriniń, respýblika boiynsha jergilikti atqarýshy organdardyń ókilderi usynǵan málimetter men esepterge sáikes, tizimderge 11 722 536 adam engizildi. 2022 jylǵy 5 maýsymǵa taǵaiyndalǵan respýblikalyq referendým ótkizý kezinde daýys berýge arnalǵan biýlletenderdi daiyndaýdyń keibir máseleleri týraly» Ortalyq referendým komissiiasynyń qaýlysymen daýys berýge arnalǵan biýlletender bir paiyz rezervpen referendýmǵa qatysýǵa quqyǵy bar azamattardyń tizimine engizilgen sanǵa teń mólsherde daiyndalady dep belgilengen. Demek, 11 839 761 kóleminde daýys berýge arnalǵan biýlleten shyǵarylýy tiis», - dedi OSK hatshysy.
Onyń aitýynsha, belgilengen mólsherde daýys berýge arnalǵan biýlletenderdi daiyndaý jáne referendým ýchaskelerine zańnamada kózdelgen merzimde jetkizý oblystyq, respýblikalyq mańyzy bar qalalar men elordanyń referendým komissiialaryna tapsyrylady.
Aýmaqtyq referendým komissiialary biýlletenderdi referendým ýchaskelerine jetkizý úshin belgilengen mólsherde daýys berýge arnalǵan biýlletenderdi daiyndaýdy 2022 jylǵy 28 mamyrǵa deiin qamtamasyz etýge tiis.
Osy oraida búgin, Ortalyq referendým komissiiasynyń «2022 jylǵy 5 maýsymǵa taǵaiyndalǵan respýblikalyq referendým ótkizý kezinde daýys berýge arnalǵan biýlletenderdiń sanyn belgileý týraly» qaýlysy qabyldandy.
