Ortalyq Qazaqstan akademiiasynyń jumysy toqtatyldy. BǴM Bilim jáne ǵylym salasyndaǵy sapany qamtamasyz etý komiteti tekserý júrgizip, kóptegen zań buzýshylyqty anyqtady, dep habarlaidy ministrliktiń baspasóz qyzmeti.
«Ortalyq Qazaqstan akademiiasynda sabaqtar tolyq kólemde júrgizilmedi, oqytýshylar qoiylǵan talaptarǵa sáikes kelmedi, atap aitqanda, oqytýshylardyń bilimi men ǵylymi dárejesi oqytylatyn pánderge sáikes kelmedi, oqý protsesi praktikalyq oqytýshylarmen, qajetti oqý ádebietterimen qamtamasyz etilmedi. Sonymen qatar ýniversitette sapany qamtamasyz etýdiń ishki júiesi bolmaǵan, sonyń saldarynan bilim bóliminiń qorytyndysy boiynsha akademiianyń kadrlardy daiarlaýdyń alty baǵytynyń stýdentteri shekti ball jinai almaǵan. Odan bólek, tiisti bilim berý baǵdarlamasyn meńgerý úshin qajetti pánderdi qaita tapsyrýda buzýshylyqtar anyqtaldy. Aralyq baqylaýdy tapsyrý kezinde ýniversitet proktoring júiesin qoldanbaǵan», - dep aitty BǴM Bilim jáne ǵylym salasynda sapany qamtamasyz etý komitetiniń basqarma basshysy Elvira Saparbekova.
Sonymen qatar jumys berýshilerdiń bilim berý baǵdarlamalarynyń reitingin taldaý Ortalyq Qazaqstan akademiiasynyń oqý baǵdarlamalarynyń basym bóligi jańartylmaǵanyn jáne eńbek naryǵy men jumys berýshilerdiń suranysyna sai kelmeitinin kórsetti. Sol sebepti mamandyqtyń kópshiligi stýdentter arasynda suranysqa ie bolmai, tek 1-den 5 adamǵa deiin ǵana oqydy.
Apelliatsiialyq quqyqty paidalana otyryp, ýniversitet sot organdaryna júgindi. Birinshi satydaǵy sottar akademiianyń talaptaryn qanaǵattandyrýsyz qaldyryp, komitettiń sheshimderin zańdy dep tanydy.
Aita keteiik, JOO qyzmetiniń erejesine sáikes stýdentter ýniversitet litsenziiasynyń qoldanylýy toqtatylǵan nemese qaitaryp alynǵan sátten bastap oqýyn jalǵastyrý úshin basqa JOO-ǵa aýysýǵa quqyly.
«Diplomnyń jaramsyzdyǵyna bailanysty qiyndyqtardy boldyrmaý úshin stýdentter qazirden bastap basqa JOO-ǵa aýysa alady. Oqytýdyń birqatar baǵyty boiynsha keibir stýdentter qysqy sessiia kezinde basqa ýniversitetterge aýysty», - dep tolyqtyrdy Elvira Saparbekova.
