Qazaqstan men Ózbekstan kelesi jyldyń basynda Silk visa ortaq qyzmetin iske qosýdy josparlap otyr. Bul týraly tilshilermen kezdesý barysynda Ózbekstan Respýblikasy Memlekettik týrizm komiteti tóraǵasynyń birinshi orynbasarynyń mindetin atqarýshy Ulyqbek Qasymqojaev málim etti, dep habarlaidy "Ult aqparat".
Onyń aitýynsha, viza Ortalyq Aziia aimaǵyna sheteldik týristerdi birlesip tartý jáne bul marshrýtty áigileý úshin engizilip otyr. Aldyn ala boljamǵa sáikes, «Silk visa» óz jumysyn aldaǵy jyldyń aqpan aiynda bastaidy.
«Bizdiń baǵalaýymyzsha, bul qyzmet 2019 jyldyń aqpanynda iske qosylady. «Silk visa» jobasy eki eldiń vedomstvolarynda kelisilgen. Endi onyń tehnikalyq tusyn jáne jabdyqtaryn kelisý máseleleri qalyp otyr», - dedi U.Qasymqojaev.
Ol sondai-aq birlesken vizaǵa Qyrǵyzstan men Tájikstan qyzyǵýshylyq tanytyp otyrǵanyn atap ótti. Bul rette, qazaqstandyq tarap bul jobaǵa Ázerbaijan men Túrkiia elderin tartpaq.
Eske sala keteiik, biylǵy jyldyń maýsym aiynda QR Senatynyń Halyqaralyq qatynastar, qorǵanys jáne qaýipsizdik komitetiniń tóraiymy Dariǵa Nazarbaeva Ortalyq Aziianyń biryńǵai vizasyn engizýdi usyndy.
