QR Premer-Ministri Asqar Mamin Ulttyq neirohirýrgiia ortalyǵynda bolyp, onda jańa radiologiia jáne radiohirýrgiia bóliminiń jumysymen tanysty, dep habarlaidy "Ult aqparat" Úkimettiń resmi saityna silteme jasap.
Úkimet basshysyna Shvetsiiada shyǵarylǵan zamanaýi «Gamma-pyshaq» kesheni tanystyryldy. Qazaqstan TMD aýmaǵyndaǵy úshinshi elge jáne osyndai joǵary tehnologiialyq jabdyǵy bar Ortalyq Aziiadaǵy birinshi elge ainaldy.
Jalpy, álemde 400-ge jýyq «Gamma-pyshaq» qondyrǵysy bar, olardyń jartysy AQSh pen Japoniiada ornalasqan. «Gamma-pyshaq» — bul bas miy isikterin, tamyrly jáne fýnktsionaldy aýrýlaryn emdeýge arnalǵan radiohirýrgiialyq qondyrǵy. Munda 192 kobalt-60 kózderinen radioaktivti sáýlelený qoldanylady, onyń sáýleleri patologiialyq oshaq aimaǵynda jinalyp, biriktiriledi. Olar isik jasýshalarynyń DNQ-syn buzady. Bul rette midyń saý tinderi men naýqastyń búkil denesi sáýlelenbeidi. Operatsiianyń ózi aýyrsyndyrmai, bas súiegin trepanatsiialaýsyz jasalady. Operatsiia bir rettik, iaǵni sáýlelik terapiia sekildi birneshe satyda júrgizýdiń qajeti joq. Sondyqtan búgingi tańda «Gamma- pyshaq» — radiohirýrgiialyq emdeýdiń «altyn standarty».
Qazaqstandyqtar mundai emdi kvota boiynsha tegin ala alady. Buǵan deiin patsientterdi qymbat emdeýge shet elderge jiberýge týra keldi. Ulttyq neirohirýrgiia ortalyǵynda Ortalyq Aziia aimaǵyndaǵy jalǵyz «Gamma-pyshaqtyń» bolýy QR-da meditsinalyq týrizmdi damytýǵa da yqpal etedi.
«Densaýlyq saqtaý júiesiniń qoljetimdiligi men tiimdiligin arttyrý – elimizdiń damýynyń basty basymdyqtarynyń biri. Ázirlenip jatqan «Deni saý ult» ulttyq jobasy aiasynda densaýlyq saqtaý infraqurylymyn odan ári jańǵyrtý jáne meditsina qyzmetkerlerin áleýmettik qoldaý sharalaryn jetildirý boiynsha sharalar kesheni qabyldanady», — dep A. Mamin, qazaqstandyq dárigerlerdi kele jatqan kásibi merekemen quttyqtady.
