Majarstanmen ekijaqty saýdany ulǵaitý arqyly ózara tiimdi yntymaqtastyqty nyǵaitý mańyzdy. Bul týraly QR Premer-Ministriniń orynbasary – Syrtqy ister ministri Muhtar Tileýberdi málim etti, dep habarlaidy QazAqparat.
«Majarstan – Ortalyq jáne Shyǵys Eýropadaǵy bizdiń senimdi serigimiz ári dosymyz. 2020 jyly koronavirýs pandemiiasy kezeńinde tórt júzden astam Qazaqstan azamatyn otanyna qaitarýǵa kómekteskeni úshin Majarstan Úkimetine alǵysymyzdy bildiremiz. Sonymen qatar, «Gedeon Richter» majar farmatsevtikalyq kompaniiasyna 2020 jylǵy jeltoqsanda Qazaqstanǵa COVID-19 indetimen kúrestegi gýmanitarlyq kómek retinde «Ardýan» preparatynyń 500 qaptamasyn jetkizgeni úshin alǵys aitqym keledi», - M. Tileýberdi.
Ministrdiń aitýynsha, búgingi kelessózderde ekonomikalyq ózara is-qimyldy tereńdetý jáne ekijaqty saýdany ulǵaitý arqyly ózara tiimdi yntymaqtastyqty odan ári nyǵaitýdyń mańyzdylyǵy atalyp ótti. Energetika, sý sharýashylyǵy, bilim berý salalaryndaǵy yntymaqtastyqqa, sondai-aq Vyshegrad toby (Ortalyq-Shyǵys Eýropa) jáne Ortalyq Aziia elderiniń tranzit-kóliktik áleýetin tiimdi paidalanýǵa erekshe nazar aýdaryldy.
«Búgin Astana halyqaralyq qarjy ortalyǵynyń alańynda Majarstan Eksport-import banki ofisiniń resmi ashylý saltanaty ótetinin qýanyshpen atap ótemiz. Bul Ortalyq Aziia óńirinde majar kompaniialarynyń múmkindikterin odan ári keńeitýge yqpal etedi», - dedi Muhtar Tileýberdi.
