Qazaqstannyń Syrtqy ister ministri Muhtar Tileýberdi beinekonferentsiia rejiminde Úndistan, Qyrǵyzstan, Tájikstan, Túrikmenstan jáne Ózbekstan syrtqy saiasi vedomstvolary basshylarynyń qatysýymen ótken «Ortalyq Aziia – Úndistan» dialogynyń ekinshi otyrysyna qatysty, dep habarlaidy QR SIM baspasóz qyzmeti.
Talqylaýǵa Aýǵanstannyń Syrtqy ister ministri Mohammad Hanif Atmar da qatysty.
Ortalyq Aziiadaǵy qaýipsizdikti nyǵaitý jáne turaqty ósýdi qamtamasyz etý maqsatynda uzaq merzimdi kópjosparly ózara is-qimyldy keńeitý, memleketaralyq bailanystardy tereńdetý máseleleri boiynsha jan-jaqty pikir almasyldy. Saýda-ekonomikalyq ózara is-qimyldyń, osy formatqa qatysýshy memleketterdiń kóliktik ózara bailanys jónindegi bastamalaryn iske asyrýdyń, sondai-aq óńirdegi sanitariialyq-epidemiologiialyq ahýaldy turaqtandyrýǵa ózara kómek kórsetýdiń perspektivalary qaraldy.
Ministrler syrtqy saiasi vedomstvolardyń kúsh-jigerin kópjaqty ózara is-qimyldyń strategiialyq mańyzdy baǵyttaryna shoǵyrlandyrýǵa, ekonomikalyq jáne óńiraralyq yntymaqtastyqty keńeitýge daiyn ekendikterin bildirdi. Ortalyq Aziia memleketteri men Úndistannyń kópjosparly yntymaqtastyǵynyń jandanýy kópǵasyrlyq dostyq, ózara qurmet pen paida dástúrlerine sáikes ortaq múddelerge jaýap beredi jáne áleýmettik-ekonomikalyq progrestiń, óńirdegi beibitshilikti, turaqtylyq pen qaýipsizdikti saqtaýdyń mańyzdy faktory bolyp tabylady.
Kezdesý qorytyndysy boiynsha Ortalyq Aziia men Úndistan Syrtqy ister ministrleriniń Birlesken málimdemesi qabyldandy.
