Boksshy Janqosh Turarovqa qatysty tyń derekter paida boldy. Jábirlenýshi Ánarý Qaldybekqyzynyń qorǵaýshysy Lázzat Ahatova is boiynsha shielenisken jaittar óte kóp ekenin málimdedi. Bul týraly zańger áleýmettik jelidegi jeke paraqshasynda jazdy.
Ahatovanyń aitýynsha, Ánarý suqbatta oiyn jinaqtai almai, kóp nárseni aita almaǵan. Shyn máninde jábirlenýshi buǵan deiin boksshynyń ústinen eki ret politsiiaǵa shaǵymdanǵan eken.
"Ánarý Janqosh Turarovtyń ústinen 2018 jyly Almaly aýdandyq politsiia bólimine aryz bergen eken. Bir kún qamaýda ustap, aryzyn qabyldamai, jibergen. Qamap, bosatyp jibergen. Kýá bolǵan qurbysy bar. Qajet bolsa, tergeýge de, sotqa da baryp, kýálik ete alamyn dep otyr. Bul bir.
Ekinshi ret, 2023 jyly jábirlenýshi Turarovqa qarym-qatynasty toqtatatynyn aityp, endi jaiyna qaldyrmasa, ústinen aryz jazatynyn aitqan. Artynsha kóshede Ánarýdy politseiler ustap, mashinaǵa salyp, Jetisý aýdandyq politsiia bólimshesine alyp kelip, birneshe saǵat uryp-soǵyp, elektroshokermen kúidirip, qinaǵan. Sebep-saldaryn aitpaǵan. Ne bolǵanyn da túsinbegen Ánarý Qaldybekqyzy uryp-soqqan politsiia qyzmetkeriniń ústinen aryz túsirgen. Is sol kúii jabylyp ketken. Qaita aryzdanamyz", – delingen zańger jazbasynda.
Sondai-aq zańger Janqosh Turarovtyń advokatynyń "aryz jazýǵa jábirlenýshi mas bop kelip, kiimin jyrtyp, beiádep qylyqtar kórsetti" degen sózderine qatysty da málimdeme jasady.
"Sol kúni aryz jazatynyn Turarovtyń áieli bilgen. Ánarýdy aryz jazýǵa itermelegen taǵy bir jaǵdai – bokserdyń áieliniń qorlaǵan sózderi. Ekeýiniń perepiskasy bar. Munda sala almaimyn, tergeýge, sotqa dálel retinde ótkizemiz. Áýezov aýdandyq politsiia bólimine kelgende, Ánarýdyń aldynan eki qyz shyǵyp, "sen ba, Janqoshtyń ústinen aryz jazbaq bop jatqan shalava?" dep, provokatsiia jasap, fýtbolkasyn jyrtyp, videoǵa túsirip alǵan. Ol eki qyzdy politsiia qyzmetkerleri qarsy alǵanyn kórgender de bar. Soǵan qaraǵanda, bul da uiymdastyrylǵan nárse dep topshylaimyn", – delingen jazbada.
Advokat Lázzat Ahatova Janqosh Turarovtyń 2014 jyly taǵy bir qyzdy zorlaǵany týraly aqparat jariialady. Zańgerdiń aitýynsha, bul týraly zorlanǵan qyzdyń ózi habarlasyp, aityp bergen.
"Janqosh Turarov 2014 jyly taǵy bir qyzdy dál Ánarý siiaqty aldap, qonaqúige aparyp, dári berip, zorlaǵan eken. Ol qyzdyń bokserdan bir qyzy bar bop shyqty. Bul jaǵdai Turarov úilenbei turǵanda bolǵan. Kelinshektiń ózi shyqty bizge. Barlyq jaǵdaiyn aityp, Ánarýǵa qoldaý bildirdi. Budan bólek, 2006 jylǵy bir qyzdy da dál osy ádispen quryǵyna túsirgen degen málimet jetti. Tek qyzdyń kim ekenin ázirge anyqtai almadyq", – delingen jazbada.
Eske salsaq, buǵan deiin Ánarý Qurmanáli esimdi azamatsha tanymal boksshy Janqosh Turarov meni zorlady dep aryzdanǵan bolatyn.
