Foto: QR OAM
Oqý-aǵartý ministriniń tóraǵalyǵymen oblys ákimderiniń orynbasarlarymen ótken keńeste mektep direktorlaryn bos laýazymdarǵa taǵaiyndaý máselesi qaraldy, dep habarlaidy Ult.kz.
2023 jyldan bastap Memleket basshysynyń tapsyrmasy boiynsha QR Oqý-aǵartý ministrligi mektepterde basqarýshylardyń jańa býynyn qalyptastyrýǵa baǵyttalǵan «Bilim berýdegi ózgeristerdiń 1000 kóshbasshysy» strategiialyq jobasyn iske asyryp keledi. Eki jyl ishinde irikteýdiń barlyq kezeńderinen sátti ótken 583 kandidat respýblikalyq kadr rezerviniń quramyna endi. 2025 jyly taǵy 400 úmitker oqýdan ótýde.
Jobany iske asyrý barysynda mektep direktorlarynyń tapshylyǵy úsh esege qysqardy. Óńirlerdiń basym bóligi basqarýshy laýazymdaryna arnaiy daiyndyqtan ótken mamandardy taǵaiyndaý arqyly kadrlyq rezervtiń múmkindikterin tiimdi paidalanady.
Odan bólek, 4 myńǵa jýyq direktor «Órleý» BAUO-da qysqa merzimdi kýrstardan ótti, bul mektepterdegi basqarý áleýetin nyǵaitýǵa jáne bilim berý júiesindegi menedjment sapasyn arttyrýǵa múmkindik beredi.
«Joba aitarlyqtai nátije berdi, mektepterde jańashyl, yntaly menedjerler paida bolady. Endi bul protsess júielep, qalǵan barlyq bos jumys oryndarǵa basqarýshy kadrlardy taǵaiyndaýdy tamyz aiynda aiaqtaý mańyzdy. Bul – direktorlardy taǵaiyndaý ǵana emes, sonymen qatar bilim berýdegi basqarý mádenietin júieli túrde jańartý. Atalǵan baǵyttaǵy jumystar naqty ózgerister men bilim berý sapasyn arttyrýǵa múmkindik beredi», – dedi Ǵani Beisembaev.
Ministrdiń aitýynsha, birqatar óńirlerde kadr rezerviniń áleýeti tolyq paidalanylmai otyr. Máselen, Almaty, Qaraǵandy, Abai, Pavlodar jáne Túrkistan oblystarynda basqarýshy kadrlarǵa qajettilik basym.
Ministr tamyz aiynda qalǵan bos jumys oryndaryna taǵaiyndaýdy aiaqtaý týraly tapsyrmanyń oryndalýyna oblystyq bilim basqarmalarynyń basshylary derbes jaýapty bolatynyn atap ótti.
