Ordabasy aýdanynyń kásipkerleri básekege qabilettilikti arttyrý halyqaralyq baǵdarlamasy aiasynda Túrkiia elinen iskerlik tájiribe almasyp qaitty. Túrkiianyń ekonomika ministrligi uiymdastyrǵan shara "Mal sharýashylyǵyn eksporttaý, qarqyndy baýdy damytý, jemis-jidekti saqtaý jáne qaita óńdeý" taqyrybynda ótkizildi, dep habarlaidy "Ult aqparat" aimaq basshysynyń baspasóz qyzmetine silteme jasap.
Is-sapar barysynda ońtústikqazaqstandyq kásipkerler Nigde qalasyndaǵy "Alma-ata" firmasynyń 1000 gektarlyq qarqyndy baýy men mal bordaqylaý alańynyń jumysymen tanysty. "Alma-ata" seriktestiginiń tóraǵasy Atilla Kaplannyń málimdeýinshe, búginde bul firma kókónis eksporttaý boiynsha Túrik Respýblikasynda úshinshi oryndy ielenedi. Atalǵan seriktestik búgingi tańda Ordabasy aýdanyndaǵy 20 gektar jeri bar "Aleksandrovskii sad" JShS-niń baýyn jetildirýge áriptestik qoldaý bildirip keledi.
Shara barysynda túrkiialyqtar ordabasylyqtarǵa kásipkerlerdi qoldaý isiniń sheteldik nusqasyn tanystyrdy. Bul taqyrypta arnaiy dóńgelek ústel uiymdastyrylyp, onda eki el arasyndaǵy iskerlik yntymaqtastyqty damytý máseleleri talqylandy. Jiynda sóz alǵan biýirqatar túrkiialyq kásipkerler Qazaqstanǵa kelip, qarjy salýǵa nietti ekendikterin jetkizdi.
Sondai-aq, olar iskerlik bailanys aiasynda topyraq erekshelikterin zerttep, soǵan orai arnaiy kóshetter jetkizip berýdi, olardy kútip-baptaý erekshelikterin úiretýdi qolǵa alyp, mamandardy da oqytýǵa ázirlikterin málim etti.
