Aqtóbeden shyǵatyn «Adyrna» respýblikalyq ádebi-kórkem, kópshilik jýrnalynyń óz jumysyn ýaqytsha toqtatatynyn barlyq oqyrmandarǵa, janashyrlarǵa, ádebiettiń shynaiy tileýlesteri men onyń úzdiksiz órkendeýine alańdaityn barlyq náti qazaqtarǵa, ulttyq rýhtyń bolashaǵyna jany men júregi alańdaityn baýyrlarǵa ókine otyryp habarlaimyn.
Osy jýrnaldyń alǵashqy sany 2016 jyldyń qarasha aiynda jaryq kórgeli beri jańa basylymǵa degen eldiń yqylasy men qadaý-qadaý azamattardyń qamqorlyǵy, qara halyqtyń riiasyz súiispenshiligi arqasynda basylymnyń jaǵdaiy kúrt jaqsaryp, «Adyrna» esimi meilinshe tanymal dárejege kóterilip edi.
Adalyna jyǵylsaq, jýrnalǵa qajetti qarjyny belgilep, júrgen jerinde shynaiy nasihattaǵan sol kezdegi Aqtóbe oblysynyń ákimi, iri memleket qairatkeri Berdibek Máshbekuly Saparbaevtyń ózi edi.
Ókinishke orai, 2020 jyldan bastap «Adyrnanyń» jaǵdaiy kúrt tómendedi: oblystyń ishki saiasat bóliminiń basshysy qańtar-aqpan ailarynda ótetin tenderdi maýsym aiynyń aiaǵyna deiin sozdy, al tender ótken soń, «qarjynyń az bólingenin» aityp, aqyry shilde aiynda eki million qarjyny bergizip, aldarqatty da qoidy.
Men, Meiirhan Aqdáýletuly, qarjynyń túbi bolatynyn aita beretin ákimshilikke senip, barlyq qarjyny óz qaltamnan tólep júrdim de, qazan aiynyń orta sheninde oblys ákimine kirip, kelesi jylǵa jazylýdy toqtatatynymdy, oqyrman úshin jeltoqsan aiynda sońǵy nomerin shyǵaratynymdy, ákimshiliktiń ýádesine senip shyǵyndanyp kelgenimdi baiandadym.
Ońdasyn Seiiluly qarjyny jergilikti qorlar arqyly óteitinin, jýrnaldyń 2021 jyly da shyǵa berýi kerektigin aityp, tynyshtandyrdy. Ýáde tym sozylyp ketken soń biylǵy aqpan aiynda ákimge taǵy kirdim. Bul joly da ákim sál kútý kerektigin, qarjynyń tabylatynyn taǵy da aitty jáne meniń Qazaqstannyń 30 jyldyǵyna bailanysty usynǵan jobalarymdy qýana qoldap, tiisti adamdarǵa tapsyrma berdi. 2021 jylǵy qańtar, aqpan ailarynyń nomerlerin shyǵaryp, jýrnaldyń naýryz, sáýir, mamyr ailarynyń nomerlerin baspaǵa ázirlep qoidyq... Al ákimshilikten áli naqty habar ǵana emes, osy máselege bas aýyrtatyndai niet joq.
Óz oqyrmany qalyptasyp, elge tanymal bolǵan jýrnaldyń osy jaǵdaiy meni tyǵyryqqa tirep, basylymnyń shyǵýyn ýaqytsha toqtatýǵa májbúrlep otyr. 2019 jyly úlken ádebi báige jariialanyp, sonyń qortyndysyna 5,5 mln teńge jumsap ádebi forým ótkizgen, halyqtyń óz ádebietine degen yqylasyn oiatyp, oblysqa, oblystyń ákimine abroi ápergen «Adyrnanyń» osy beishara kúige túskenine, tirajy úsh jyl ishinde «Juldyzdan» asyp túsken jýrnaldyń eshkimge endi qajetsizdigine jáne... resmi biliktiń «ýádesi» arqasynda óz basym 19,0 mln aqshany ákimshiliktiń úzdiksiz ýádesine bola óz qaltamnan tólegenime ǵana emes, «rýh, t.t.» dep sairaǵanda aldyna jan salmaityndardyń qazaqy rýhty osylai da qorlaýǵa bolaryna qairanmyn. Ony sot arqyly sheshýge talpynarmyz, biraq «Adyrnany» qorlyqqa salarlyqtai eshteme istemep edik.
Sonymen... ázirge áli de úmittimiz.
Barlyq tileýlesterden keshirim ótinemin.
Meiirhan AQDÁÝLETULY,
«Adyrna» jýrnalynyń bas redaktory,
Qazaqstan Jazýshylar odaǵynyń múshesi, QJO basqarma múshesi,
aqyn, kósemsóz sheberi. «Qurmet» ordeniniń, J.Nájimedenov atyndaǵy syilyqtyń iegeri.
20 sáýir, 2021
