Elimizdiń barlyq óńirindegi meshitterdiń aýlalarynda Oraza ait namazy oqylady. Bul jaiynda Qazaqstan Musylmandary dini basqarmasynan málim etti, dep habarlaidy "Ult aqparat".
«Sizderge elimiz boiynsha meshitterdiń aýlalarynda Oraza ait namazy oqylatyndyǵyn (Jergilikti bas sanitarlyq dárigerlerdiń qaýlysy boiynsha ruqsat etilgen) qýanyshpen jetkizemiz. Eń bastysy meshitke kelýshi musylman jamaǵatyn tómendegi saqtyq sharalarǵa mán berýge shaqyramyz: betperde (maska) kiip kelý; úiden dáret alyp kelý; namazdan soń qol berip amandaspaý; namazdan keiin kóp kidirmei úige qaitý; jamaǵatpen oqylatyn namazǵa baliǵatqa tolmaǵan balalardy alyp kelmeý. Naýqastar men áielderdiń ait namazyna qatyspaǵany abzal», - delingen dini basqarma málimdemesinde.
QMDB barsha musylman qaýymyn osy jaǵdailarǵa túsinistikpen qaraýǵa shaqyrady.
«Juqpaly indetti taratpaý úshin ár azamat óziniń otbasy, qoǵam aldyndaǵy jaýapkershiligin tereń sezinip, sanitarlyq talaptar men meshit tártibine baǵynýy qajet. Barsha jamaǵatty ózi men otbasynyń, elimiz ben jerimizdiń amandyǵy úshin Jaratqanǵa duǵa jasaýǵa úndeimiz. Alla Taǵala jer betindegi kúlli adamzatty túrli apattan saqtap, juqpaly indetten aman etkei! Ámin!», - dep atap ótedi QMDB-dan.
