Biyl Ramazan aiynda jarapazan jyryn jatqa aitýdan saiys uiymdastyrylmaq. Bul týraly Qazaqstan musylmandary dini basqarmasynyń tóraǵasy, elimizdiń bas múftii Naýryzbai qajy Taǵanuly málim etti, dep habarlaidy QazAqparat.
«Jarapazan – qasietti Ramazan aiynyń kelgenin habarlaityn, halyqty izgilikke úndeitin jyr. Jarapazan aitý – dástúrimizde bar jaqsy úrdistiń, jaqsy ǵuryptyń biri. Qazaqstan musylmandary dini basqarmasy Ramazan aiynda jarapazan jyryn jatqa aitýshylar arasynda arnaiy saiystar uiymdastyrýdy josparlap otyr. Osy rette igi dástúrimizdi buqaralyq sipatta nasihattaý úshin aqparat quraldary ókilderin dini basqarmanyń izgi bastamalaryna aqparattyq qoldaý kórsetýge úndeimin», - dedi Naýryzbai qajy Taǵanuly OKQ-de onlain ótken brifingte.
Onyń aitýynsha, elimizde ata-babalarymyzdyń san ǵasyrdan beri ustanyp kelgen dini joly – ihsan ilimi jan-jaqty nasihattalyp keledi.
«Alla Taǵala qasietti Ramazan aiynda ustaǵan orazamyzdy qabyl etip, mol saýapqa kenelgen pendelerinen etkei. Jaratýshy Jabbar Iemiz elimizge amandyq, jerimizge tynyshtyq berip, táýelsizdigimizdi baiandy etkei», - deidi ol.
