Qazaqstanda azamattyq alyp úlgermegender úshin oralman mártebesi uzartyldy, - dep habarlaidy Tengrinews.kz tilshisi QR Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
Táýelsizdik alǵan sátten bastap Qazaqstan etnikalyq qazaqtardyń elge erikti túrde oralýyn yntalandyrý saiasatyn júrgizedi.
1991 jyldan bastap 303 myń otbasy nemese 1 mln.40 myń etnikalyq qazaq tarihi otanyna oraldy jáne oralman mártebesin aldy, bul el halqynyń 6 paiyzyn quraidy. Osynyń arqasynda kóshi-qonnyń teris saldosynyń deńgeiin tómendetip, demografiialyq ósimge qol jetkizildi. Olardyń kópshiligi qazaqstandyq azamattyqty alyp, basqa azamattarmen teńdei elimizdiń áleýmettik-ekonomikalyq damýyna qomaqty úles qosyp keledi.
Qazaqstanda etnikalyq repatrianttardyń beiimdelýi men kirigýi úshin barynsha qolaily jaǵdailar jasalǵan. Sonymen, oralman mártebesin alǵandarǵa Qazaqstan Respýblikasynyń azamattyǵyn jeńildetilgen tártippen alýǵa quqyǵy bar (qalǵan sheteldikter Qazaqstanda keminde 5 jyl turýy qajet).
Sonymen qatar, oralman mártebesi ony alǵan kúnnen bastap bir jyl ótken soń toqtatylady. Oralman mártebesin uzartý oralman mártebesi toqtatylǵan kúnnen bastap úsh aidan aspaityn merzimge ótinish bergen kezde jeńildetilgen tártippen azamattyq alý maqsattary úshin ǵana kózdeledi.
Biraq, búgingi tańda oralmandar usynylǵan ýaqyt ishinde jeńildetilgen tártippen qazaqstandyq azamattyǵyn almaǵan, kórsetilgen jaǵdaidyń týyndaý sebepterine qaramastan, mundai múmkindikten aiyrylady. QR Eńbek jáne halyqty áleýmettik qorǵaý ministrligine osy máseleni sheshýge kómek kórsetý boiynsha kóptegen ótinishter kelip túsýde.
Osyǵan bailanysty, biyl 16 naýryzda Qazaqstan Respýblikasynyń Prezidenti - Elbasy Nursultan Nazarbaev oralmandar mártebesin jeńildetilgen tártippen 2019 jyldyń 31 jeltoqsanyna deiin uzartý týraly sheshim qabyldady.
Osylaisha, mártebesi keshiktirilgen oralmandar ony uzartý jáne qazaqstandyq azamattyǵyn alý úshin ishki ister organdaryna qujattardy ońailatylǵan tártippen berý úshin jergilikti atqarýshy organdarǵa júgine alady.
