Eńbek jáne halyqty áleýmettik qorǵaý ministrligi oralman mártebesin berý tártibin ózgertýdiń negizgi sebepterin túsindirdi, dep habarlaidy Sputnik Qazaqstan tilshisi.
Vitse-ministr Ahmadi Sarbasovtyń aitýynsha, búginde zań boiynsha etnikalyq qazaqtar oralman mártebesin alý úshin Qazaqstan táýelsizdik alǵanǵa deiin shet memlekettiń aýmaǵynda turǵanyn qujatpen rastaýy qajet. Al 1991 jyldan keiin týǵan etnikalyq qazaqtar ondai qujattardy bere almaidy.
"Osyǵan bailanysty, "oralman" uǵymyn jańa redaktsiiada jazý usynylady. Oǵan sáikes, etnikalyq qazaq buryn Qazaqstan Respýblikasynyń azamattyǵynda bolmaýy negizgi kriterii bolady. Ekinshiden, Qazaqstanda ýaqytsha jáne turaqty turýǵa ruqsat berýdiń qazirgi tártibine sáikes, etnikalyq qazaqtar aldymen yqtiiarhat alýǵa, sodan keiin jeńildetilgen tártippen azamattyq alý úshin ishki ister organdaryna júginedi",- dedi Sarbasov Májiliste ótken jiynda.
Osyǵan orai, oralmandarǵa qolaily jaǵdai jasaý úshin, sondai-aq, ótkiziletin qujattardyń qaitalanýyna bailanysty turaqty turý ruqsaty men Qazaqstan azamattyǵyn bir mezgilde berý múmkindigi usynylyp otyr.
Budan bólek, oralmandar úshin beiimdeý jáne yqpaldastyrý ortalyqtarynyń fýnktsiialaryn keńeitý josparlanyp otyr. Qazirgi kezde ondai ortalyqtar Qaraǵandy men Shymkent qalalarynda, sondai-aq, Túrkistan oblysy Aqsýkent aýylynda bar. Al oralmandar jii qonys aýdaratyn Aqmola, Qostanai, Pavlodar, Shyǵys Qazaqstan men Soltústik Qazaqstan oblystarynda áli ashylmaǵan.
"Tórtinshiden, búgingi kúni qonys aýdarýshylardy qabyldaýdyń óńirlik kvotasyna engizýge azamattardan ótinishter qabyldaý quzyreti jergilikti atqarýshy organdarǵa, atap aitqanda, jumyspen qamtýdy úilestirý basqarmalaryna júktelgen. Biraq is júzinde barlyq qonys aýdarýshy jumyspen qamtý ortalyqtaryna ótinish bildiredi. Sondyqtan osy quzyretti jumyspen qamtý ortalyqtaryna zańdy túrde bekitý usynylady", - dep atap kórsetti Sarbasov.
Aita keteiik, búgin parlament májilisinde "Qazaqstan Respýblikasynyń kóshi-qon protsesterin retteý máseleleri boiynsha keibir zańnamalyq aktilerine ózgerister men tolyqtyrýlar engizý týraly" zań jobasy tanystyryldy.
